Ingen god sommarstart

Sjølv om det dukka opp einskilde tørre og varme dagar, kan ikkje årets juni få heilt «godkjent» som sommarmånad.

Fjorårets juni var jo særdeles fin, og såleis er det ikkje uventa at det kom noko meir nedbør i år. Men skilnaden er overraskande liten. Mest regn fekk sjølvsagt Matre. Med 217,7 millimeter var det einaste bygda over 200-grensa. På plassane bak følgde Ølve og Husnes. Når det gjeld minst nedbør har vi etter kvart blitt vane med at den prisen går til Sæbøvik. Der stoppa måleglaset på 106,4 mm.

 

Om nettene

Vang i Rosendal kunne gle seg over flest dagar utan regn. Der var det 11 opplette døger. I Omvikdalen kunne innbyggjarane droppa paraplyen i berre seks dagar. Heldigvis kom mykje av nedbøren om nettene, slik at det likevel var mogleg å bevega seg utandørs på dagtid. Spesielt rundt midten av månaden var det ein periode med gode vêrtendensar.

Totalt etter fyrste halvår er det temmeleg jamt mellom 2018 og 2019. I dei fleste bygdene har det kome mest nedbør i år, men i Omvikdalen og Uskedalen er det faktisk motsett. Historisk sett kan Hydro Husnes opplysa at juni 1982 er tørrast med smått utrulege 7,9 millimeter, medan 2011 dundra til med 280,1 mm.

 

Høgaste

Temperaturen nådde heilt opp til 28,8 grader i Austrepollen den 6. juni. Husnes fekk på si side den lågaste målinga, men 6,7 grader er ikkje så halv-gale. Snittet for månaden låg rundt 15 grader, noko som er relativt likt fjoråret. Hittil i år er snitt-temperaturen på 7,13. Det er det høgaste sidan 2014.