Ingen 5G til Kvinnherad i 2022
Innan utgongen av 2022 skal 88 nye byar og kommunar få 5G-nett. Kvinnherad er ikkje blant desse, og kundane her i kommunen må såleis smørja seg med tolmod.
Publisert
I ei pressemelding frå Telia 17. juni kom det fram at Kvinnherad var blant kommunane i Vestland som hadde valt deira tenester for sine brukarar. 21. juni kom det ei ny pressemelding, der Telia la fram kva kommunar og byar som vil kunne kopla seg på 5G-nett i løpet av dei neste seks månadane.
I Vestland er desse stadene på planen for siste halvdel av 2022: Alver, Askvoll, Aurland, Austevoll, Bjørnafjorden, Bremanger, Fjaler, Gloppen, Gulen, Hyllestad, Høyanger, Kinn, Kvam, Luster, Lærdal, Osterøy, Samnanger, Sogndal, Solund, Stad, Stord, Stryn, Sunnfjord, Sveio, Ullensvang, Vaksdal, Vik, Voss og Årdal.
Annonse
Landsdekkande i 2023
Men eit landsdekkande 5G nett står på trappene for kommunikasjons-leverandøren Telia.
– Me skal vera først i Norge med eit landsdekkande 5G-nett i løpet av 2023, og er veldig stolte over å kunne tilby ei betre kundeoppleving på mobil og breiband til stadig fleire nordmenn, seier administrerande direktør i Telia Norge, Stein-Erik Vellan, i pressemeldinga.
Parallelt med utbygginga av 5G blir også 4G-nettet til Telia modernisert. Dette betyr at farten, dekninga og kapasiteten på 4G også vil bli betre.
