Ingeborg VM-debuterer

– Kjekt med to omvikdelingar på same landslag, smiler den ferskaste av VM-ryttarane.

Vidar Mehl har vore med på det norske landslaget i denne idretten lenger enn Ingeborg har drive med han. Det var nemleg først på våren i 2020 at ho byrja og sykla, i stor grad påverka av pappa Georg og broren Gunnar, som begge har drive lenger med sykling.

Inspirasjon

– Bror min og pappa inspirerte meg til å byrja. Eg prøvde litt på våren i 2020, det var kjekt. Så eg kjøpte sykkel, sykla stadig lengre turar. No har eg oppgradert litt og litt, og har Swift-rulle, forklarer 20-åringen.

E-sykkel føregår inne på ei såkalla Swift-rulle. Rulla er kopla mot eit nettverk, og held styr på kor raskt og langt du syklar, og viser syklistane i eit felt opp mot kvarandre.

– Egbruker same sykkel inne som ute. Det er ikkje så mykje anna som trengs for vera med, anna enn ein pc i nærleiken. Og så treg du ei vifte, for det er varmare å sykla inne enn ute. Av den grunn må du også drikka meir, mellom anna, oppsummerer Ingeborg.

Eliminering

18. februar går VM av stabelen. Det blir gjort på eit litt spesielt vis.

– I staden for eitt langt ritt, blir det tre korte ritt med eliminering etter dei to første ritta, forklarer syklisten.

Kvart varer i 20-25 minutt, før det er ti minutt pause og så nytt ritt. Det er 100 deltakarar i første rittet, så får 30 sykla andre og 10 sjølve finalen.

– Eg trur det blir knalltøft, så det er berre å knalla til det eg har i det første løpet. Eg skal sykla litt slike ritt med nokon utanlandske ryttarar no fram mot VM, fortel Ingeborg.

Per Korsvold har laga ein plan for ho, som dei sjekkar kvar veke for å sjå om dei skal justera seg eller halda planen. To løp, to intervalløkter og ei roleg langkøyring pluss kvile.

– Eg har oftast to ritt i veka, blant anna eit temporitt saman med 4-6 andre, og eitt ritt individuelt. Det blir rundt åtte-ti timar i veka på sykkelen, men det er meir effektive timar enn når eg trenar ute, meiner Ingeborg.

Formtopp

At ho er tatt ut til den same meisterskapen som Vidar Mehl , er stas.

– Eg har køyrt dei same ritta som Vidar, men eg har ikkje sett han, berre damene. Eg hadde ikkje trudd dette då eg skulle til å sykla Norgescup tidlegare, seier 20-åringen om telefonen frå sykkelforbundet med beskjed om at ho var tatt ut til VM. Ettersom ho klokka inn ein andreplass i norgescupen i haust, så har det vore vanskeleg å koma utanom ho i uttaket.

– Det er veldig greitt med dei ritta som Norges Cykelfobund (NCF) har som digitale løp. Det sparer deg for både tid og reise, så det er både lett tilgjengeleg å vera med på, meiner ho.

– Når du blir tatt ut no, så betyr det at forbundet ser på deg som mest skikka?

– Me er kanskje ikkje best ute, men me har deltatt på desse norgescupen og gjort det bra der, og trener vinter og sommar, medan andre satsar meir på sommarritta og utesykling, seier omvikdelingen.

18. februar skal ho i elden. Om ho lagar til eit slags arrangement der folk kan koma og heia på ho, er ikkje heilt klart enno.

– To månader går fort. Det likevel tid til å førebu seg mentalt og prikka inn ein formtopp til då. Dette er ein gøy ting å vera med på, og det er jo stas å bli tatt ut og lagt merke til, sluttar Ingeborg.