Inga Raudt-lista trass iherdig forsøk

Stortingsrepresentant Sofie Marhaug engasjerte seg for å hjelpa Raudt til å stilla kommunevalliste i Kvinnherad. Men forsøket førde ikkje fram.

I inneverande periode har SV og Raudt stått saman om Sosialistisk fellesliste. Men i haust vart det klart at lista ikkje vert vidareført, trass i at begge partane let vel over samarbeidet.

Medan SV for lengst er klare med si liste til haustens kommuneval, kunne Raudt attende i januar melda at dei ikkje makta å stilla. Årsaka var at dei hadde for få personar som tilbydde seg å stå høgt på lista, vera aktive og bli valde inn i nemnder og utval.

– Vi kunne alltids fått saman ei liste. Men dei siste periodane har vi markert oss, og Raudt har stor framgang nasjonalt. Dermed er det realistisk at vi kunne få inn eit par representantar. Og får du inn to, så treng du etter vårt skjønn å ha ei handfull aktive for å gjera ein skikkeleg jobb. Ein skal då ha folk inn i utval, ein treng vararepresentantar og ei gruppe som kan jobba frå møte til møte, stod det i ei pressemelding.

Veldig spennande

Éi vekes tid før fristen gjekk ut 31. mars, engasjerte stortingsrepresentant Sofie Marhaug seg i saka. Ho bidrog til eit siste forsøk på å skaffa nye namn.

«Kjenner jeg noen som vil stå på Rødts valgliste i Kvinnherad? Vi har flere strålende kandidater, men sliter med å komme helt i mål. Ikke nøl med å ta kontakt! Ellers gleder jeg meg til å komme til Kvinnherad på 1. mai. Så uavhengig av om vi klarer å få listen i havn, så blir det altså en rød vår på Valen», skreiv ho på Facebook.

No avslører Gaute Lund korleis innsatsen enda.

– Det blir stadig inga Raudt-liste, diverre. Sofie sitt utspel har fått fleire bra folk til å melda seg, folk det skal bli veldig spennande å jobba med framover. Men vi hadde stadig ikkje nok folk til å bekle dei øvste plassane», fortel han til lokalmedia.