Ikkje så surt som ein skulle tru

Omvikdalen toppar nedbørsstatistikken for mars. Der dalte det ned så mykje som 246,5 millimeter regn og snø. Dermed vart Matre forvist til 2. plass, med 211,3 mm. Uskedalen er heilt oppe på tredje plass og vakar med sine 180,0 mm. Tre bygder nøya seg med mindre enn hundre millimeter; i rekkefølge var det Sæbøvik, Sunndal og Rosendal.

Jamt over viser oversikta vår at det regna ein del meir i mars 2024 enn tilsvarande månad i fjor. Men totalt etter tre månader er biletet mykje meir nyansert. Vi finn nemleg fem målestasjonar som har registrert meir nedbør i år, og like mange som noterte meir i fjor.

Hundre års drift

Ser ein på talet døger utan nedbør, kan Mauranger (Sunndal) skilta med heile 17 av den sorten. Ølve og Matre stoppa på 11. Underlagsmaterialet slår eintydig fast at fyrste halvdel av mars var mykje finare enn resten. Eit eksempel er Hatlestrand; der falt det berre 3,8 millimeter frå den 1. til og med den 12. Sunndal overgår dette, for der stoppa det på 2,1 millimeter i den same perioden.

Ifølgje Meteorologisk institutt var det fleire vêrstasjonar i Norge med meir enn hundre års drift som sette nedbørsrekordar i mars. På topp trona Flekkefjord med 257,9 millimeter, altså berre 11,4 millimeter meir enn Omvikdalen.

– Det vart sett 17 stasjonsrekordar for døgnnedbør, 27 rekordar for høg månadsnedbør og 28 rekordar for låg månadsnedbør, seier klimaforskar Jostein Mamen i ei pressemelding.

Sidan 1966 kan Hydro Husnes informera om at mars 1967 er den våtaste der i garden med imponerande 487,5 millimeter. Vesentleg betre, og aller best, var det i 2013 med 14,6 mm.

Mykje vind

Temperaturane svinga veldig i mars. I Rosendal, til dømes, gjekk ein frå 14,8 grader som høgaste pluss den 3. til minus 1,5 som det lågaste den 10. Seinast 26. mars opplevde dei fleste bygdene kuldegrader.

Den varmaste målinga kunne Mauranger gle seg over, med 16,9 grader den 30. mars. Snitt-temperaturen hittil i år er på 3,12 grader, notert i Uskedalen. I landet sett under eitt vert mars karakterisert som ein normal til mild månad. Snittet var 1,9 grader over normalen.

Vind har det vore kolossalt mykje av hittil i år, i alle fall viss ein ser på dagar det har blåst monaleg. Mars vert toppa av 25,5 meter i sekundet i Rosendal den 13.

Målestasjonar

Oversikten viser noteringane til følgjande målestasjonar: Ølve (Henrik Barthel), Hatlestrand (Gunn-Bente Stølen), Mauranger (Tore Bondhus), Rosendal - Eik (Jan Eik), Rosendal - Vang (Kvinnherad Elektro), Omvikdalen (Birgit Mørkve Hjelmeland), Matre (SKL), Uskedalen (Kurt Haugland), Husnes (Hydro), Valen (Jarle Håvik) og Sæbøvik (Harald Særsten).

Snitt-temperatur totalt pr. mars:

2024: 3,12

2023: 2,98

2022: 4,37

2021: 1,72

2020: 4,65

2019: 3,83

2018: 1,79

2017: 3,43

2016: 2,54

2015: 4,0

2014: 5,0

2013: 0,2

Kjelde: Kurt Haugland, Uskedalen