Ikkje nøgd med samarbeidet med kommunen

Rektoren ved den private Ølve Montessoriskule meiner at denne skulen ved fleire høve ikkje har fått tilsendt viktig informasjon som dei andre skulane har motteke.

Rektor Hildegunn Håbrekke har snakka med ordførar Hans Inge Myrvold om saka, og i forståing med han har ho sendt brev til Kvinnherad kommune om det ho kallar «utfordringar eg har knytt til samarbeid med kommunen». Ho skriv der at ho ved to høve tilfeldigvis oppdaga at Ølve Montessoriskule ikkje har fått den informasjonen dei andre skulane har motteke.

«Dette gjeld viktig informasjon frå Kvinnherad kommune som skal vidaresendast til føresette (gjeld eit skriv om skabb i dette høvet), og møte eg skulle vore med på for at elevane her skal ha dei same rettane som elevane ved dei kommunale skulane (gjeld mellom anna ped-koordinatormøte, som representant for PPT meiner eg burde vore på)», står det i brevet.

Håbrekke bed difor om at det vert gjort ei vurdering på kvar ho som rektor ved Ølve Montessoriskule skal vera deltakar, og at skulen sin kontaktinformasjon vert lagt inn der den skal.

 

– Kan ikkje heilt skjøna kritikken

Sektorleiar for oppvekst, Anne Sofie Bjelland Kjeka, er ikkje samd med kritikken frå Ølve Montessoriskule.

Kjeka opplyser at det er Statsforvaltaren i Vestland (Fylkesmannen sitt nye namn frå 1. januar) som har tilsynsmynde og rettleiingsansvar for private skular. Ho understrekar at kommunen likevel har teke kontakt med Ølve Montessoriskule og invitert rektor til fagmøta i skuleleiargruppa.

– Det har vore ein del skifte av rektor, og dei har svært sjeldan delteke på møta. Skuleeigar i kommunen har også delt sjekklista for smittevern med den private skulen, for å hjelpa dei om det skulle oppstå ein situasjon på deira skule. Foreldrerepresentanten i FAU i Ølve skule er invitert til kommunale FAU-møte, fortel ho til Grenda.

– Vi synest det er trist at den private skulen opplever situasjonen slik, og kan ikkje heilt skjøna kritikken, avsluttar sektorleiar Kjeka.