- Ikkje langt unna revolusjonerande

I sommar gjekk Rosendalstunet til innkjøp av vitalkonseptet til Feelgood; eit folkehelsekonsept med motoriserte treningsmaskinar. Ulikt dei tradisjonelle treningsapparata driv ikkje desse av brukarens eigen muskelkraft, men vert i staden for styrt av ein motor og ein girkasse som gjer at maskinane går av seg sjølv. Dette gjer at brukarar kan trene aktivt eller passivt ut i frå eigne evner og behov.

Det er tidlegare einingsleiar ved Rosendalstunet Leif Kongestøl og fysioterapeutane Knut Richard Alvheim og Anne Teigen Myklebust som står bak prosjektet. Grenda møter dei i aktivitetsrommet på Rosendalstunet, der treningsmaskinane vert presentert.

– Det var fysioterapeutane som kom over Feelgood-konseptet, og då eg undersøkte det nærare, tente eg på ideen med ein gong. I nært samarbeid med Frisklivsentralen og Geir Ove Fosse søkte me om midlar til å etablere og skape ein aktiv møteplass, og fekk 1 million i stønad, noko som gjorde at det heile vart mogleg. No har me totalt fem motoriserte maskinar på plass, fortel Kongestøl.

Spreke seniorar

Initiativtakarane fortel at apparata ofte vert nytta av både kort- og langtidsbebuarar ved Rosendalstunet, dagavdelinga og polikliniske pasientar. Då Grenda var innom onsdag føremiddag strøymde det på med treningsglade seniorar. Olav Femsteinevik (86) og Johannes Seglem (97) trener på aktivitetsrommet opp til fleire gongar dagleg, og desse karane er ikkje i tvil om at det nye konseptet gir merkbar effekt.

– Det er skikkeleg god trening dette. Ein kjenner det i heile kroppen, og så er det jo svært sosialt også, fortel Olav medan han sit på rotasjonsmaskina. Dette er eit apparat som trenar dei skrå og rette magemusklane, samstundes som armar og bein vert kopla inn. Øvinga styrkar og aktiverer mage og korsrygg, noko som aukar blodsirkulasjonen.

På maskina ved sida av sit Johannes. Han har valt ut øvinga «side bend stepper», som bøyer korsryggen sidevegs slik at oksygentilførselen i korsryggen aukar. Dette løyser opp spenningar og fungerer som smertelindring for vonde ryggar.

– Eg er jo komen i ein alder der ein lett stivnar. Fysisk aktivitet er difor viktig, og med slike maskinar blir det både enklare og trivelegare å trene, smiler Johannes.

Idé gav resultat

Treningsapparata skal gi brukarane eit lågterskel treningstilbod, som legg til rette for førebygging og sosialt samvær.

– Me er oppteken av trening, fallførebygging og rehabilitering. Sjølv om ein ikkje kan, eller av ulike grunnar ikkje vil ta i sjølv, utfører brukaren likevel øvingar i maskina som strekkjer og aktiverer alle dei store muskelgruppene i kroppen, informerer Kongestøl.

Apparata kan bli nytta av alle, uavhengig av alder, fysisk form og helse. Kvar treningsmaskin er dessutan forskjellig og rettar seg mot ulike muskelgrupper.

– Det er eit heilt aspekt me ønskjer å retta tilbodet mot, men me er i ein tidleg fase og vegen må bli til litt undervegs, fastslår Kongestøl og held fram:

– Me vil først og fremst nå ut med tilbodet til dei som er her på korttids rehabiliteringsopphald, bebuarar på institusjon, polikliniske pasientar, dei i bufellesskap/omsorgsbolig og heimebuande. Dagavdelingen nyttar mellom anna tilbodet fast to gongar i veka. Etter kvart er det mogleg å gi opplæring og få inn gruppeaktivitetar, slik at det i framtida kan koma fleire til gode.

Fremjar trivsel og betrar helsa

Det nye konseptet kan samanliknast med ein elektrisk sykkel, då maskinen hjelp deg i gang, og så er det opp til deg sjølv kor mykje du vil angstrengja deg. Mengd repetisjonar, rørsleform og tidsbruk er bestemt på førehand og apparata er skreddarsydd for å kunne gi ein sirkel med øvingar som trenar og aktiverer heile kroppen.

– Dette konseptet har eg verkeleg trua på, og det er ikkje langt unna revolusjonerande. Me har til no fått mange tilbakemeldingar frå brukarar om at maskinane fremjar trivsel og betrar helsa, og det er fantastisk kjekt å høyre, smiler Kongestøl før Alvheim supplerer:

– Dette er verkeleg eit løft for rehabiliteringa, og eit godt supplement i arbeidet vårt.

– For pasientar som eksempelvis er lamma av slag, kan dette konseptet bidra til å oppretthalde rørsla i den lammande kroppsdelen. Det er mange tilpassingsmogelegheiter med diverse ekstrautstyr som gjer det mogleg å trene for dei aller fleste, informerer Myklebust.

Høgare aktivitetsnivå

Frå tidlegare av har brukarane kunna nytta seg av spesialtilpassa syklar med ein skjerm kor dei kan sykle seg gjennom velkjente stader. Desse er svært populære blant brukarane og har blitt flittig brukt, men med dei nye apparata har dei merka ein betydeleg aktivitetsauke.

– Me gleder oss over å sjå at det er eit høgare aktivitetsnivå no enn tidlegare. Den linken som er tenkt, med å fremja trivsel og leggja til rette for eit sosialt fellesskap, ser me blir realisert, fortel Myklebust.

– Eg blir så glad av å sjå alle som nyttar seg både av utstyret og rommet generelt. Det er blitt eit flott samlingspunkt på huset, avsluttar einingsleiar Tone Tufta Gaugstad.