Idretten og frivilligheita får straumstøtte

– Eg er svært glad for at våre innspel saman med krav frå ei rekkje andre lag og organisasjonar over det ganske land har gitt resultat, seier ordførar Hilde Enstad og peikar blant anna på at Øystein Skaala frå Steinparken var ein av dei som skreiv brev til regjeringa på vegne av fleire lag og organisasjonar.

Enstad sjølv løfta også problematikken i sitt brev til stasministeren.

– Det er svært hyggeleg å kunna melda at regjeringa med kultur- og idrettsminister Anette Trettebergstuen (Ap) i spissen har laga ei ordning med straumstøtte til frivillige lag og organisasjonar, skriv Enstad i ein e-post.

Ville gått utover tilbodet

Kulturministeren fortel i ei pressemelding at barn og unge allereie har ofra mykje gjennom pandemien.

– Dei høge straumprisane har skapt store utfordringar for svært mange lag og organisasjonar. Dei har stått i fare for å anten måtta kutta i aktiviteten eller krevja auka deltakaravgifter for å betala rekningane sine. Det ville gått direkte utover fritidstilbodet for barn og unge, som allereie har ofra mykje gjennom pandemien. Eg er difor glad for at regjeringa no lagar ei ordning for å gje eit tilskot som kan dekka deler av dei utgiftene, seier kulturminister Anette Trettebergstuen i ei pressemelding.

Idrettslag og andre frivillige lag og organisasjonar har så langt ikkje vore inkludert i regjeringa sine tiltak mot dei høge straumprisane.

Men no får dei ei eiga ordning, der straumstøtta skal fordelast i kommunar som har hatt ein gjennomsnittleg straumpris i desember på over 70 øre per kWt. Kommunane skal så fordela tilskotet til lokale lag og organisasjonar.

– Ordninga skal vera enkel og inneberer minst mogleg papirarbeid for laga. Rammene for straumpakka vil reknast etter om lag same modell som for hushald, som får dekka 80 prosent av straumutgiftene som går over 70 øre per kWt, står det å lesa i regjeringa si pressemelding.

Ordninga skal gjelda for perioden desember 2021 til mars 2022.