I sluttfasen med Salmon Eye: – Vi nærmar oss noko

Dagleg leiar Sebastian Torjusen i Salmon Eye fortel at prosjektet med det unike visningsanlegget no er i sluttfasen, og om ikkje lenge er han klar til å gå ut med opningsdato.

Sebastian Torjusen frå Rosendal vart tilsett som dagleg leiar i Salmon Eye tilbake i oktober 2020, og har sidan då følgd vegen frå teiknebrett til realisering tett.

– Vi har halde korta ganske tett til brystet heile vegen, og har endå ikkje nokon fastsett opningsdato. Men om ikkje lenge er vi klare til å gå ut med dato for opning av anlegget. Stålkonstruksjonane er ferdige og vi er i gang med innreiinga, så nærmar oss verkeleg noko no, seier Torjusen.

– Blir likt som visualiseringa

Heilt sidan Eide Fjordbruk gjekk ut med illustrasjonane av det iaugefallande visningssenteret, som skal liggja på utsida av Snilstveitøy, har interessa utanfrå vore stor.

– Det er eit prosjekt med ein lang historie, og vi merkar at det er ein enorm interesse for både bygget og konseptet. Vi kommuniserte tidleg visualiseringa av visningsanlegget, som er ulikt noko ein tidlegare har sett. Og folk har trudd og trur kanskje framleis at det ikkje kjem til å bli sjåande slik ut, men eg kan stadfesta at det kjem til å bli slik som vi har visualisert, smiler Sebastian.

Lakseauga vert på mange måtar ein kunstinstallasjon i seg sjølv, men det er det som skjer på visningsanlegget som er det viktigaste.

– Salmon Eye er eit visningsanlegg med ein tredelt visjon. Vi vil inspirera, bidra til å auka kunnskap og gje gode opplevingar for dei som besøkjer Salmon Eye. Men det er sjølve læreopplevinga som er det viktigaste, seier Torjusen og held fram:

– Faginnhaldet er det ikkje Eide Fjordbruk sjølv som sit og produserer. Vi har eit fagpanel beståande av flinke folk frå blant anna SSB/NHH, Havforskingsinstituttet, Mattilsynet og Universitet i Bergen som skal skapa ein balanse i det innhaldet vi skal gje til våre besøkjande.

Givande og vanskeleg

Sidan Salmon Eye er eit ganske unikt prosjekt, har Sebastian i jobben som dagleg leiar måtta gå ned mange nye stiar for å landa på dei beste løysingane for prosjektet.

– Det har både vore veldig kjekt og veldig krevjande. Dette er eit prosjekt som ingen har gjort før. Det er ingen som har sett liknande tidlegare, så vi må gjera mange ting for fyrste gong. Det er både givande og vanskeleg. Men eg er sikker på at det kjem til å gje oss eit kult sluttresultat som vi og forhåpentlegvis publikum blir nøgde med, seier han.

Med seg på lakseauge-laget har Torjusen også fått Laila Langesæter i stillinga som opplevingskoordinator.

– Laila er komen inn og skal vera med å laga gode visningsopplevingar. Ho er veldig flink, så det er utruleg kjekt å ha fått ho på plass. Vi er allereie i gang med å jobba fram korleis visningsopplevingane skal bli best mogleg for dei besøkjande, sluttar han.