I sluttfasen med «MiniEgget»
«MiniEgget» nærmar seg ferdigstilling ved Herde Kompositt i Ølve, og det vert jobba på spreng for å fullføra pilotanlegget som skal overleverast til Hauge Aqua i løpet av våren.
Publisert
Sist oppdatert
Det var i fjor sommar at støypinga av Hauge Aqua sitt flytande oppdrettsanlegg «Egget» E2000 starta hjå Herde Kompositt. I fyrste omgang vert det bygd eit egg som er 21 meter høgt og 15 meter i diameter, og som har 1.850 kubikkmeter vatn som oppdrettsvolum. Dette er kun ein tidel av volumet, men banar veg for hovudprosjektet sitt 44 meter høge egg.
Det er spennande dagar på verftet i Ølve, der «MiniEgget» som skal vera klart til å ta imot fisk i mai 2022, vert ferdigstilt. Herde Kompositt sin utviklingssjef, Kristine Moldenhauer Biseth, seier til Kyst.no at det vert jobba intensivt på den gamle livbåtfabrikken no.
Annonse
– Mykje av arbeidet er framleis innandørs for å ferdigstilla dei store delane som skal bli til «Egget». Denne veka har vi byrja å reisa deler av «Egget» på kaien. Dette er modul C som er sjølve «hovuddelen» som fisken skal vera i, opplyser ho til nettstaden.
Trass i at denne fyrste versjonen vert kalla «MiniEgget», er det ingenting mini med delane som selskapet no set saman. Konseptet er eit eggforma, lukka oppdrettsanlegg med gjennomstrøymingsanlegg, der vatnet vert pumpa inn frå botn, sett i bevegelse og sila før det vert sleppt ut.
Utsett i to månader
Opphavleg var leveringsfristen for «Egget» sett til mars månad, men det er no utsett til utgangen av mai.
Annonse
– Dette har to hovudårsaker. Den fyrste er covid-19 og påfølgande forseinking på ein del komponentar. Den andre er forbetringar på design som er dukka opp undervegs i produksjonen, forklarer utviklingssjefen til Kyst.no.
Modul C av Egget vart sett saman fyrste veka i mars, og dei andre modulane skal snart rullast ut av de store portane.
Det meste av utrustningsarbeidet blir gjort av Herde Kompositt sine eigne tilsette, men utviklingssjefen seier det er eit par underleverandørar som skal vera med på igangsetting og testing før Egget skal leverast. Talet tilsette i sving på prosjektet har variert utifrå kva fase ein har vore i.
– Då vi starta opp drifta 1.april i fjor var vi 49 tilsette. Per i dag er vi 70 tilsette, og vi har behov for endå fleire, seier utviklingssjefen.
Litt armar og bein
Jens Martin Gjærum er byggeoppfølgingsingeniør for Hauge Aqua. Han seier til Kyst.no at det er veldig kjekt å sjå at ting som har vore på ein PC og i utrekningar endeleg tar skikkeleg form.
Annonse
– Det er fyrst då ein ser kor stort dette prosjektet faktisk er. Det er sjølvsagt litt armer og bein for å få fiksa alt som skal fiksast, men det høyrer til, seier han.
Gjærum opplyser at alle store seksjonar no er sett saman; kuppelen på toppen, flytekragen, hovuddelen av Egge-skalet og botnseksjonen.
– Attståande aktivitetar vil vera samanstilling av dei fire hovudseksjonane, samt noko installasjon av utstyr og oppkobling av elektro- og automasjonsanlegget. Siste finish vil vera luker, dører, siler og filter. Til slutt blir det gjennomført testkøyring i flytande posisjon i fjorden utanfor Ølve. I parallell jobbar vi med at alt skal vera klart til mottak på lokalitet, seier han.
