I natt skal klokka stillast

No er det slutt på sommartida, og vi går tilbake til den ordinære tidsrekninga. Mange lurer nok på kor lenge vi skal fortsetja med å svitsja mellom sommar- og vintertid.

«I 2018 føreslo Europakommisjonen å avskaffa ordninga med sommartid. Imidlertid har EU enno ikkje konkludert i saka, og det er uklart når det vil skje. Europaparlamentet bad i 2021 Rådet for den Europeiske Union, som består av EU sine medlemsland, om å få fortgang i arbeidet. Saka er framleis til handsaming der», vert det opplyst i ei pressemelding frå Nærings- og fiskeridepartementet.

– Vi ser til EU før vi tar stilling til om vi skal slutta å stilla klokka. Det gjer vi av fleire omsyn, men det er klart at det vil vera ein fordel for næringslivet å ha same tid som våre næraste naboland, seier næringsminister Cecilie Myrseth (Ap) i pressemeldinga.

Skulle spara kol

Departementet opplyser elles at den historiske grunnen til sommartidsordninga var energisparing.

«Nokre land innførte sommartid under fyrste verdskrig for å spara kol som skulle brukast i krigen. Det vert sagt at George Hudson var den fyrste som føreslo sommartid. Han var forskar og ynska seg meir sol på kvelden for å driva med insektsamling», skriv departementet.

Norge hadde sommartid fyrste gang i 1916, deretter 1940-45, 1959-1965, og så kvart år sidan 1980. Som alltid er hugseregelen at vi skal stilla klokka mot næraste sommar, det vil seia at ho skal éin time tilbake i natt.