Anika Madsen opplever enorm suksess med restauranten Iris på Salmon Eye. I kveld kan dei til og med sikra seg Michelin-stjerne.

I kveld kan Iris få Michelin-stjerne

NRK omtalar Iris på Salmon Eye som ein av dei norske restaurantane som er aktuelle for å få Michelin-stjerne. Måndag er dessutan Iris-leiinga observert på flyet til Helsinki, der utdelinga føregår i ettermiddag.

Håvard Sætrevik
Redaktør/Grenda
Publisert Sist oppdatert

På måndag skal årets Michelin-stjerner for Norden delast ut i Helsinki, i ein seanse som etter sigande er ei Oscar-utdeling verdig. Det store spørsmålet, sett med lokale auge, er om me kan enda med éi eller fleire Michelin-stjerner i Kvinnherad.

Matbloggar Anders Husa seier til NRK at han trur Iris i Hardangerfjorden er ein kandidat til stjerne, når statskanalen omtalar utdelinga i Helsinki i ei nettsak.

Etter det Grenda kjenner til, er både Iris-kokken Anika Madsen og Salmon Eye-leiar Sebastian Torjusen observert på flyet frå Bergen til Helsinki måndag føremiddag. Madsen er ikkje ukjent med Michelin-stjerne frå tidlegare, for ho har bakgrunn frå restauranten Formel B i København.

Sjølve sendinga går direkte på Youtube, og startar i 17-tida, slik at dei ekstra kulinarisk interesserte – alternativt berre nyfikne – kan følgja utdelinga av Michelin-stjerner live.

økonomi mat og næringsmiddel kuriosa og kjendisar nyhende
Powered by Labrador CMS