I kamp mot særskrivingsfeil

Den sjølverklærte komikaren har valt å ta opp kampen mot særskriving- og orddelingsfeil, blant anna gjennom føredrag på skular og andre eventar for både vaksne og ungdommar.

Han brukar humor som verkemiddel gjennom bilete som tar for seg ulike komiske situasjonar som kan oppstå når ein trykkjer ein gong for mykje på mellomromstasten. Ulveseter såg ut til å klara å fenga elevane som var til stades på Husnes ungdomsskule, med både vittigheiter og skarpe replikkar.

– Eg får stort sett god respons på skulane eg kjem til. Det blir ein del latter og fnising. Eg vil heller kalla det eit stand-up-show enn føredrag, fortel Ulveseter.

Tilfeldigheiter

Komikaren er no på det 8. året der han reiser rundt i Noregs land med føredraga sine. Han har også gjeve ut to bøker om emne. Det starta seint ein kveld i 2013 med ein Twitterkonto, som vidare blei til ei Facebook-side.

Ganske kjapt gjekk Facebook-sida hans viralt, og han fekk omtale i både aviser og ulike medium over heile landet. Ei av dei fyrste som tok kontakt for å spørja om å få lov til å låna bileta hans, var ein lærar som ynskte å bruka dei i undervisingsamanheng.

Tilbakemeldingane på resultata var, i fylgje læraren, oppsiktsvekkjande. Antal særskriving- og orddelingsfeil vart betrakteleg redusert ved neste tentamen. Ein stad på vegen vart han tipsa om å søka seg inn i den kulturelle skulesekken, noko han no er ein del av.

Keisamt

Norsklærar ved Husnes ungdomsskule, Marianne Eidsvik, fortel at dei største grammatiske feila ho ser er orddeling- og kommafeil.

– Det som går igjen er at dei ikkje set komma, og at dei deler orda. Dei har så mange inntrykk frå engelsk på TV og sosiale media, og på engelsk delar dei jo orda heller enn å samla dei, fortel Marianne.

Vidare fortel ho, som Ulveseter også var inne på, at elevane nesten automatisk tenkjer at norsk er det mest keisame faget. Då er det vanskeleg å motivera dei, og den største utfordringa dei har i norskfaget er å få elevane til å lesa.

– Ein tredje ting me veit, som Ulveseter poengterte, er at viss du vil bli betre på å skriva, så må du lesa meir. Dessverre så tykkjer elevane at det er keisamt å lesa, dei er jo meir vane med å sitja å skrolla og få nye impulsar heile tida. Det er nesten litt trist, avsluttar ho.

Bilete i hovudet

Ved spørsmål om kva dei tykte om showet til Ulveseter, svarte Sofia Othelie Handeland at det var gøy og litt morosamt.

– Eg fekk nokre aha-augneblink og kjem til å oppfatta fleire orddelingsfeil når eg ser dei, fortel ho.

– Eg kjem til å ha permanente bilete i hovudet kvar gong eg ser ein orddelingsfeil framover, kunne Mikael i 8C fortelja.

– Det er jo positivt?

– Nei, det kjem til å irritera meg, avsluttar han.