– I år introduserer me Tyssedalstorsdag og Sunndalssundag
I midten av mars skjer det igjen, Hardanger Spillfestival går av stabelen. Og denne gongen vert det både nye kategoriar òg endå meir som skal føregå i Sunndal.
Festivalen oppstod etter eit ynskje om å skapa meir liv i Odda og omland, og med over femti kategoriar ein kan konkurrera eller delta i, kan det jo seiast at dei har lukkast i så måte. Årets festival blir altså den femte i rekka.
– Festivalen føregår alltid i veke 11, i år blir det mellom 14-17. mars. Nytt av året er at me ynskjer å spreia aktivitetane litt meir utover, i tillegg til at me har fleire kategoriar enn tidlegare. Så i år introduserer me Tyssedalstorsdag og Sunndalssøndag, fortel festivalsjef Joakim Sørå.
Annonse
– Me byrjar festivalen i Tyssedal med alt i frå bordtennis til legorobotkøyring og snøballkasting. Deretter går det slag i slag dei neste dagane med ulike spel og konkurransar kringom i Odda, med alt i frå klassiske spelekonkurransar til barne- og familiearrangement, så vel som teaterforestilling og lokal kjendisversjon av Forråder, forklarer han vidare.
Uhøgtidleg
Festivalen blir så avslutta med Sunndalssundag, og Kristian Bondhus Jensen, som er mannen som har ansvaret for Sunndalsarrangementet, kan fortelja om eit program som har blitt godt utvida sidan i fjor.
– I fjor blei me utfordra på om me ville ha ei lite arrangement i Sunndal med øksekasting. Det enda med å bli ein veldig kjekk dag med mykje folk. I år skal me også ha øksekasting, men me skal også utvida med både hesteskokasting og fleire spelekonkurransar innandørs. I tillegg vil det også bli eit eige leikerom med gigantiske legoklossar, seier Jensen
Annonse
Jensen tykte det var veldig kjekt i fjor, og håpar og trur at det blir endå kjekkare i år.
– Me reknar med at det kjem endå fleire folk i år. Det er jo uhøgtidlege ting dette, men folk blir ofte veldig engasjerte og eg trur at konkurranseinstinkta kjem til å slå hardt inn, avsluttar den engasjerte arrangementsleiaren.
