I 25 km/t frå Husnes til Gulen
Einar Oppedal har ikkje kvidd seg med å frakta arbeidsreiskapen sin på tvers over kommunegrenser. Men å køyre traktor mellom Husnes og Gulen, kor han kjem frå, er utvilsamt ein tolmodig affære.
Publisert
– Første gong eg køyrde traktor frå Husnes til Gulen var for tolv år sidan. Den gjekk 25 km i timen. Eg kjøpte traktoren før eg slutta på Søral, og køyrde den opp til staden der eg er i frå. Der sto den ei stund, før eg køyrde attende til Husnes, fortel Oppedal blidt.
Han har teke den same ruta, i same type framkomstmiddel, fire gonger. Sist i november i fjor, men då i ein traktor som gjekk noko raskare. Den han har i dag flyttar seg nemleg 40 kilometer i timen.
Annonse
Skulle åt skogen
– Eg køyrde til Årsnes, tok ferja over til Gjermundshamn, køyrde vidare til Åsane og forbi Lindås. Så tok eg ferja på Leirvåg til Sløvåg, og der frå var det 6 kilometer att før eg var heime. Eg hadde traktoren der i 14 dagar før eg køyrde heim att, forklarar han.
Å koma seg frå A til B tok 6 timar i rein køyretid. Ferjeturane kom i tillegg. I Gulen har traktoren blitt nytta til ved- og skogsarbeid på eigedommen Oppedal har der, same nytta gjer den heime på Husnes.
– Eg har lurt på om eg skulle hatt meg ei lita gravemaskin òg, men eg nærmar meg jo 80 år, så eg veit ikkje om eg skal gje meg i kast med det, humrar han.
Annonse
Skulle han likevel finne på det, blir det nok ein tur frå Husnes til Gulen, med gravemaskina på traktorhengar.
