– Hyttedraumen finst framleis!
Suldal Hyttebygg ynskjer å vera meir tilgjengelege for potensielle hyttekundar i Sunnhordland og Bergen, og har nyleg etablert seg i Fonnafjord Næringspark.
Publisert
Sist oppdatert
– Sjefen er av den framoverlente typen, og ved å etablera eit knutepunkt i Kvinnherad blir me meir tilgjengelege for kundar i denne regionen, seier Tone Merethe Hustveit på det nye kontoret Suldal Hyttebygg har etablert på Seimsfoss.
Førre fredag flytta ho verksemda inn i næringshagen, det vil sei PC, nokre skjermar og eit par knaggar med tvilsam klistreeffekt.
Annonse
Etter nokre dagar i næringshagen ser ho fram til å dela kontorfellesskap med fleire i tida framover.
Satsar på Sør-Norge
– Herifrå vil me marknadsføre Hedda-hyttene våre for kundar frå Kvinnherad, Ullensvang, Voss og Bergen. Frå Bergen blir det mogleg å hiva seg på båten til Rosendal, så er ein her i løpet av to timar. Det er dessutan litt kjekt å ikkje etablera seg i byen, men å få folk til å besøka oss ute i distriktet, smiler Hustveit.
Kontorfellesskapet og fasilitetane Fonnafjord Næringspark kunne by på, til dømes kantine, bidrog til at valet falt på Seimsfoss då eit nytt knutepunkt for kundane lenger nord Rogaland skulle etablerast.
Annonse
Suldal Hyttebygg har hovudkontor og fabrikk på Sand i Suldal kommune, kor hyttene blir produsert i ferdige element, før dei blir frakta ut til tomta dei skal setjast opp på. Konseptet er arkitektteikna hytter som glir inn i terrenget.
Sidan 2004 har verksemda vore stolt leverandør av Hedda-hytter på Vestlandet. I tillegg til hovudkontor på Sand har verksemda kontor i Haugesund og visningshytte ved Forus i Stavanger.
Straumlause løysingar
– Er det ikkje litt krevjande å satsa innan hyttemarknaden om dagen, særskilt når marknaden dykkar fell saman med områda som også har dei høgaste straumprisane? Hyttefolket får jo ikkje straumstøtte.
– Folk er litt meir avventande no ja, men når privatøkonomien stabiliserer seg att må me vera klare. Hyttedraumen finst, og då må me visa at me er her. Me skal vera klare når kundane kjem, svarar Hustveit.
Men Suldal Hyttebygg har merka seg at kundane ser etter berekraftige løysingar, og som eit svar på det har dei satsa på straumlause hytter, der dei legg til rette for eit hytteliv som er litt meir «back to basics».
Annonse
– No i haust har me lansert hytter med integrert solcellepanel, og me marknadsfører straumlause hytter. Det er jo det folk ser etter no; kor kan ein spara?
Sjølv om den økonomiske situasjonen pregar marknaden per i dag, ser bedrifta lyst på framtida.
– Me får fortsatt ein del brosjyrehenvendingar og alt tyder på at hyttedraumen fortsatt lever, sluttar Hustveit.
