Hyllest til krigsseglarane
Helge Jordal og Harald Dahlstrøm har skapt ein teaterkonsert som presenterer historia om krigsseglarane i landet. Denne blir servert i Riddersalen førstkomande laurdag.
Publisert
Teaterkonserten er ein hyllest til desse heltane, men byr samstundes på eit skråblikk på korleis krigsseglarane har blitt behandla, skriv Baroniet Rosendal i ein kort føreomtale.
Helge Jordal er ein kjenning på vestlandsscenene, og treng ingen vid presentasjon. Men tematikken rundt krigsseglarane har iallfall engasjert skodespelaren og musikaren i mange år.
Annonse
Jordal starta karriera si som bryggesjauar, og har mellom anna turnert i heile landet med einmannsførestillinga «Førstereis», som tek utgangspunkt i den store sjøfartstida i Norge etter andre verdskrig. I 2016 vart Jordal heidra under utdelinga av Anders Jahres Kulturpris for nettopp denne førestillinga. Prisen fekk han for å ha løfta fram og formidla krigsseglarane sine dramatiske historier og liv. Ein kan såleis vera ganske trygg på at den komande teaterkonserten både er underhaldande og informativ.
