Hydro Husnes: Godt resultat i krevjande marknad

– Trass i framleis krevjande marknad for aluminium, er det fleire moment som sikrar eit godt andre kvartal for Hydro Husnes. God drift, gode prisar på aluminiumsprodukta me leverer, svak krone og sal av overskotskraft har saman bidratt til eit godt økonomisk resultat, seier fabrikksjef Jon Ola Ystgaard i ei melding i samband med at resultata for andre kvartal vart presentert.

Fabrikksjefen gler seg over at det er god framdrift på viktige utviklingsprosjekt på aluminiumsverket. I andre kvartal blei det avgjort å investere 95 millionar kroner på å oppgradera og effektivisere produksjonscellene i A-hallen på same måte som dei gjorde med B-hallen i 2020.

– Arbeidet med oppgraderinga av den delen av A-linja som no er stengt er godt i gang, og vil vera ferdigstilt i 2024. Det er svært positivt at me kan bruka ein periode med lågare aktivitet til å utvikla aluminiumsverket, kommenterer Ystgaard.

Han meiner slike prosjekt skaper ringverknader og livsgrunnlag for Husnes-samfunnet, og reflekterer deira tru på framtida for aluminiumsverksemda i Norge.

– Ei langsiktig og ambisiøs satsing på Husnes krev imidlertid stabile og føreseielege rammevilkår som for eksempel CO2-kompensasjonen har gitt oss. I tillegg treng me tilgang på meir fornybar kraft som vass- og vindkraft for vår norske verksemd, skriv fabrikksjefen i samband med at kvartalsresultatet vert offentleggjort.