Husnes båthamn: Finalist i Årets gjestehamn 2022

16 hamner var nominert til å bli Årets Gjestehamn 2022, ei landsdekkjande kåring i regi Båtmagasinet. Gjestehamna på Husnes var blant dei seks som fekk flest nominasjonar før finaleavstemminga tok til.

Sidan midten av april har båtfolk hatt moglegheita til å stemme på sin favoritt blant finalistane: Helgøysund marina, Våge Hamn, Horten gjestehamn, Husnes gjestehamn, Mandal gjestehamn og Oscarborg gjestehamn.

6. mai var siste sjans til å stemme, og vinnaren vart offentleggjort 16. mai: Helgøysund marina på Talgje i Ryfylke fekk såleis to festdagar etter ein annan. Som årets gjestehamn vart dei heidra med diplom og flagg, i følgje Båtmagasinet.

Kvalitetsstempel frå båtfolket sjølv

Det er eit kvalitetsstempel å bli nominert, då kåringa er basert på opplevinga og preferansane til båtfolket som vitjar hamnene. Dei nominerte kan sjåast på som utvalde publikumsfavorittar i den landsdekkande kåringa.

Tore Hansen Lyngnes ved Husnes båthamn hadde ikkje fått med seg at dei var nominert i år. Likevel vart den gledelege overraskinga teke godt imot.

– Det er kjempekjekt å bli nominert! Det viser at folk set pris på å koma hit. Hamna er fint bygt opp, og vi helde på å jobba litt heile tida. No har vi fått på plass nye nettsider, og alt er jo dugnadsbasert, kommenterer Lyngnes.

Nokre av fordelane deira er at det er eit breitt aktivitetstilbod i nærområdet, med til dømes volleyball- og golfbane, gode tur-moglegheiter og nærleiken til Husnes storsenter.

– Vi har mellom anna fått gode tilbakemeldingar på at det har gått buss mellom hamna og storsenteret, og det reknar eg med vil gå sin gong i år òg, seier han.

Håpar på godt besøk

Sesongen så langt har vore normal, med ein svært god påske. Dei vonar det kjem godt besøk i pinsehelga, men er elles spente på korleis sommaren vil bli med tanke på drivstoffprisane.

– Det kan jo hende folk vil liggja fleire netter på kvar plass.

I så tilfelle er det mogleg ein tryggleik å leggja seg til på ei hamn som har vore Årets gjestehamn-finalist.