Husk dette før fisketuren: Strengare reglar i fiske etter sjøaure og laks

Frå 1. mars gjeld seinkingspåbod for garn, det er strengare reglar for fiske i fredingssonar og all fiske etter laks og sjøaure er forbode i Hardangerfjorden fram til 30. april.

– Fiske etter laks og sjøaure med stang og handsnøre frå båt og land er tillate heile året, unntatt i Hardangerfjorden frå 1. mars til og med 30. april. Forbodet er innført av omsyn til dei svake stammene av sjøaure i Hardanger. Forbodet gjeld i midtre og indre Hardangerfjord, frå ei linje ved Bleiknes ved Husnes over til Ystadnes ved Ølve i Kvinnherad kommune, og innover, skriv statsforvaltaren i Vestland i ei pressemelding.

Setjast ut – daud eller levande

Det er forbode å fiska etter laks eller sjøaure med garn. Ved fiske i sjøen er det ei plikt å setja garnet slik at det ikkje fangar laks eller sjøaure.

– Om ein skulle koma til å fanga anadrom laksefisk i garn satt for å fanga saltvassfisk, skal fisken sleppast ut at uansett om han er daud eller levande, skriv statsforvaltaren.

Frå 1. mars til og med 30. september er det berre tillate å nytta setjegarn til fiske etter saltvassfisk. Alle garn som har maskevidd over 32 millimeter skal seinkast, slik at heile fangstdelen til kvar ei tid står minst tre meter under havoverflata.

– I Hardangerfjorden innanfor Bleiknes ved Husnes og Ystadnes ved Ølve, og fjordane rundt Osterøy, skal alle garn uansett maskevidde seinkast i same periode, slik at fangstdelen står minst tre meter under overflata, står det å lesa i pressemeldinga.