Høyringsfrist i dag: Reglane om koronasertifikat kan bli forlenga

11. februar sendte Helse- og omsorgsdepartementet eit forslag på høyring, då dei ynskjer å forlenge verketida for dei mellombelse avgjerdslene om koronasertifikat.

Dei mellombelse reglane om bruk av koronasertifikat vart innført ved lov 11. juni 2021 nr. 66, og trådde i kraft same dag. I november vart verketida forlenga til 1. juli 2022, men av omsyn til beredskap meiner departementet at det er naudsynt å opne for bruk av koronasertifikat også utover dette.

«Vi må vere førebudd på endra smittesituasjon og at det kan bli naudsynt å gjeninnføra strenge smitteverntiltak. Beredskapen må framleis vere høg og vi må kunne reagere effektivt.» heiter det i høyringsnotatet.

Motstandarane tyr til § 102 i Grunnlova

Førebels er det meldt inn mange høyringssvar, kor enkeltpersonar står for hovuddelen av desse. Av svara Grenda har undersøkt er fleire av innvendingane mot forslaget grunngjeve med «Retten til respekt for privatlivatliv, familieliv og heim».

Høyringsbrevet frå Helse- og omsorgsdepartementet melder at dei med framhald av reglane med koronasertifikatet, kan inngrep i retten etter den europeiske menneskerettskonvensjon forsvarast dersom det ivaretek eit legitimt formål, har tilstrekkeleg hjemmel og er forholdsmessig. Punktet vert grunngjeve på følgjande måte:

«Ulike smitteverntiltak vil etter omstenda gripe inn i borgarane sin rett til respekt for sitt privatliv, familieliv og heim, til dømes ved at dei avgrensar borgarane sin autonomi, moglegheita til å utøve familieliv på tvers av landegrenser eller pleie sosiale relasjonar eller tilgangen til å motta besøk i eigen heim. Avhengig av sertifikata sine bruksområde vil framleis oppretthalding av smitteverntiltak overfor personar som ikkje har koronasertifikat, kunne utgjera inngrep i desse personane sin rett til respekt for privatliv, familieliv og heim.»