Hos denne bilforhandlaren vel færre elektrisk: – Trur nokre kvir seg

Det er noko lågare enn landssnittet, som Opplysningsrådet for veitrafikken (OFV) nyleg kunne rapportera om at var på om lag 90 prosent. Vestlendingane kom også ut på topp når det gjaldt å velja elektrisk, og 91,2 prosent av selte bilar i Vestland i fjor var heilelektriske.

Bernt Bjørsvik og gjengen ved Dimmelsvik bil kan fortelja at dei har lagt bak seg eit godt år, og at dei totalt selte 155 bilar. Eit tal som omfattar både personbilar og varebilar. Av desse var 44 nybilar, og dei resterande 111 var brukte bilar.

– Når ein ser på totalen for personbilar og varebilar hamna vi på 75 prosent elektrisk. Tar ein derimot varebilane ut av rekninga, vil eg anslå at prosenten stig til 80, seier dagleg leiar Bernt Bjørsvik.

Hybrid populært

Trass strengare reguleringar og høgare avgifter, er det framleis hybridbilane som tronar på toppen hos bilforhandlaren i Dimmelsvik.

– Toyota har dessutan eit stort utval av desse bilane, og er godt kjend for hybridbilane sine. Dei har derimot ikkja hatt så mange heilelektriske bilar på marknaden fram til no, men dei jobbar med fleire, nye elektriske bilar, som kjem på marknaden i år, forklarar han.

Bjørsvik trur dermed at el-talet også hos dei naturleg nok vil stiga.

– Men framleis er det ein del som ønsker å kjøpa fossilt. Det er dessutan mange som vil sikra seg fossile nybilar før det er for seint. Men dette handlar nok også om pris, seier han.

Store framsteg

Dimmelsvik Bil-sjefen fortel at som bilforhandlar, dreier det seg om å henga med i svingane.

– Vi lever midt oppi ei svært rask utvikling. Framleis trur eg det er ein del som kvier seg for å kjøpa brukte elbilar, men også dette vil nok endra seg med tida, legg han til.

Bilseljaren Hallvard Vågen pendlar kvar dag frå Jondal, og trur at det det grøne skiftet på bilfronten går litt saktare på bygda.

– Vi har ofte lengre distansar og dårlegare infrastruktur kva gjeld lademoglegheiter på bygda, så det er nok litt som framleis manglar for at alle skal føla seg heilt trygge på at elbil er det rette valet for dei, fortel Vågen, som starta i bedrifta som 21-åring for fire år sidan.

Han peikar på den såkalla naboeffekten, og trur fleire blir tryggare på elbilar dersom dei ser at andre har det. Bilseljaren legg likevel til at det ikkje er alltid kundane sjølv veit heilt kva dei er på utkikk etter.

– Det er lett å gå seg vill og bli overvelda av all informasjonen ein finn på nett, så då er det vår jobb å rettleia kunden for å finna den bilen som passar best til deira behov, seier han.

Han får støtte frå kollega Atle Reime-Johansen, som blei med på seljarlaget for om lag eit halvt år sidan, og som tidlegare har jobba for Bondekompaniet.

– Det er fordelen med å kjøpa bil hos ein forhandlar, kontra på nett. Då får ein skreddarsydd hjelp, legg han til.

Positiv

Bjørsvik og dei to seljarane har god tru på at også 2025 blir eit godt bilår, og dei peikar mellom anna på nye heilelektriske varebilar som dei håpar vil vera med på å tetta ein hól i marknaden.

– Dessutan kjem det som nemnt også ein rekke nye modellar for elektriske personbilar, noko vi ser fram til, sluttar Bjørsvik.