Høgsesong for dumping av dyr – NOAH ber om tips

– Dumping av dyr er forbode, men likevel skjer dette kvar einaste sommar. Å skaffa seg dyr inneber forpliktingar til å sørgja for at dyret får eit godt liv, seier veterinær og leiar i NOAH Siri Martinsen i ei pressemelding.

41 dyr

– Dersom ein skal på ferie, eller av andre grunnar ikkje lenger kan ta vare på dyret, er ein plikta til å sørgja for ein ny heim eller forsvarleg pass. Dessverre er dette eit ansvar som ikkje alle tek på alvor, fortset ho.

Så langt i år har NOAH meldt dumping av til saman 41 dyr, hovudsakleg kattar og kaniner.

– Dumping er ein type kriminalitet som ikkje alltid blir oppdaga, og som for sjeldan ender i oppklaring i dei tilfelle der sakene blir meldt. Men det er alltid nokon som veit noko, og som kunne bidrege til at dei som utset dyr for desse lidingane blir stilt til ansvar, uttalar Martinsen.

– Me oppmodar alle som får nyss om dumping av dyr til å melda i frå til politiet, og gjerne også oss i NOAH, legg ho til.

Omplassering

NOAH kjem også med nokre tips dersom du vurderer om omplassering av kjæledyret ditt kan vera aktuelt:

• Har dyret ditt endra åtferd? Det er viktig å hugsa på at endring i åtferd kan ha samanheng med smerter og sjukdom. Ta alltid dyret med til veterinær fyrst. Dersom problema fortset finst det også mange gode åtferdskonsulentar som kan hjelpa deg og dyret over tid.

• Problem etter at eit nytt dyr blei introdusert i familien? Fyrst og fremst treng det «gamle» dyret tid til å venda seg til situasjonen, det er ikkje lett å føla seg truga i sin eigen heim. NOAH oppmodar også sterkt om at det ved omplassering ikkje er det «gamle» dyret som blir omplassert, då gamle dyr har knytt sterke band til familien.

• Er tida eit problem? Kanskje det å finna ein «avlastingsheim» kan vera ei god løysing? På den måten kan du framleis behalda dyret, samtidig som dyret får det den treng av fleire omsorgspersonar.