Høge ambisjonar om Vestland som leiande region globalt

Posten tok form som ein paneldebatt, kor Silje Skjelsvik (Om i morgon), Pinar Heggernes (UiB), Ole Øvretveit (Initiativ Vest) og Tore Furevik (Nansensenteret) la fram sine innlegg. Eystein Jansen (Academia Euroopea) hadde rolla som moderator.

Debatten avdekte ein felles ambisjon om at regionen skal vera leiande i den grøne omstillinga. Samstundes tydeleggjorde den at det føreståande stortingsvalet truleg får avgjerande følgjer for om Vestland vil nå målet om å bli ein nullutsleppsregion innan 2030. Fleire av innlegga la såleis press både på politiske parti og veljarar i spørsmål som gjaldt berekraft, energi og klima.

Korleis lukkast?

Eystein Jansen starta med å poengtera at Vestland allereie er leiande, og likeins har gode forutsetningar for å behalda den leiande posisjonen i det grøne skiftet. Posisjonen må ein likevel arbeide aktivt for å ivareta, ønskjer ein å bli liggjande i tet, meinte han.

– Vestlandet er leiande, men korleis kan vi rigga regionen til å bli i denne posisjonen? Kan vi skape dei titusenvis av arbeidsplassane som treng? undra Jansen, før han inviterte første paneldeltakar til podiet.

Silje Skjelsvik, frå Om i morgen, meinte at det viktige er å finne løysingar som ikkje blir morgondagens problem. For å klara dette talte ho for at fleire må sjå forretningsmoglegheitene som fins i det grøne skiftet.

– Norge må slutte å leite etter fossil energi, seier FN. Norges største parti vil fortsetja. Vi sit i ein unik posisjon, i ein unik region, vi har eit unikt utgangspunkt. Spørsmålet er no; kva gjer vi med det?

Det overordna svaret ho kom med var å minske gapet mellom næringslivet, akademia, mellom gründerer og investorar.

Nye teknologiar som verkty

Akademia sto for neste innlegg, og Pinar Heggernes, prorektor UiB, tykte det var ekstra flott å snakke om Vestland i eit globalt perspektiv frå hjarta av den vakre regionen, nemleg Rosendal.

– Næringslivet på Vestlandet har alltid vore internasjonalt orientert, og det har vore sterkt forankra i regionen sin kultur og naturressursar, spesielt hav og havbruk, energi og vasskraft, sa ho.

For at dei ulike institusjonane og næringslivet kunne halda fram i ein leiande posisjon berekraftig utvikling også vidare, peika ho på nye teknologiar som gode verkty.

– UiB skal halda fram å leggja til rette for at Vestlandet kan bli verande i tet, slo ho fast, og la til at det nettopp var forsking på hav og klima som la grunnlaget for at universitetet i Bergen vart etablert for 75 år sidan.

Det vil kosta

Ole Øvretveit, dagleg leiar i tenketanken Initiativ Vest, var neste til å ta mikrofonen. Han byrja med å minna om FN sin ferske klimarapport, som underbygga det han dernest slo fast: Vi har dårleg tid. Men på Vestlandet har vi enno dårlegare tid.

Han viste i denne samanhengen til at halvparten av jobbane på Vestlandet er knytt til petroleumssektoren, og denne oljeavhengigheiten hemmar dei grøne omstillingane i regionen.

– Eit framleis oljebasert Vestland kan bli ei bakevje i Europa, meinte han.

Sjølv om ein omstillingsprosess vil kosta var han likevel trygg på at det vil vera betre for Vestland å vera ein omstillingsregion enn ein oljeregion.

Tore Furevik, direktør ved Nansensenteret i Bergen, stilte dernest spørsmål ved kva det ville sei å lukkast, jamfør tittelen på programposten. Basert på forsking var arbeidsløyse, nedgongstider og fråflytting viktige element i det å lukkast. Omgrepet han trekte fram i dette høvet var rammevilkår.

Krevst ei mental omstilling

– Regionen vår har dei gode hovuda, fantastisk mykje gode folk, men mange av desse nyttar hovuda sine på oljeindustrien, sa Furevik og kom med ein ambisjon for omstillinga frå denne industrien til ein berekraftig skifte: Å foruriena må bli dyrare, og det å leva miljøvenleg må bli enklare og billegare.

Vidare meinte han at landet har mange gubbar – og med det meinte han både menn og kvinner – med gamle tankar, som burde omstilla seg mentalt. I denne samanhengen vart også dei største politiske partia i landet nemnd som litt bakpå.

Furevik passa på å trekkja fram dei positive punkta som kom fram i FN-rapporten, mellom anna at den internasjonale trenden går meir over på fornybar energi. Han såg difor optimistisk på framtida.

– Me har pengar og ressursar til å omstilla oss, sa Furevik, og såg såleis ingen grunn til at Vestlandet ikkje skal vera ein føregangsregion i globalt perspektiv.