Hoem Blikk blir ein del av Teca
Hoem Blikk blir frå 1. desember ein del av Teca si avdeling på Husnes. Alle dei fire tilsette skal jobba vidare i Teca, og blekkslagarverkstaden på Sunde vil halda fram som før.
Publisert
Sist oppdatert
– For oss var det viktig å finne ein lokal aktør som satsar i Kvinnherad og Sunnhordland. Me har jobba mykje saman med Teca og tidlegare KES over fleire år, seier Morten Hoem i ei pressemelding i samband med innlemminga
Teca har avdelingskontor på Husnes, og dette skal også halda fram som før.
Annonse
– Me er svært nøgde med å ha fått Morten og dei med på Teca-laget, seier Jan Ivar Westvik, avdelingsleiar for Klima og Energi i Teca, i pressemeldinga.
– Det er høg aktivitet, og me har ein stor ordrereserve framover, så det er godt å få med fleire flinke folk. Tilgangen på verkstaden og utstyret der vil også gje oss eit fortrinn framover, og styrke avdelinga i Kvinnherad, legg Westvik til.
Hoem Blikk har blitt drive av far Steinar, saman med sønene Morten og Thomas. Dei har hatt med seg éin tilsett.
– Me har jobba saman med Teca lenge og kjenner dei godt, det blir kjekt å få fleire kollegaer og bli del av noko større, seier Hoem i pressemeldinga.
Annonse
Westvik fortel at Teca har fått mange nye medarbeidarar i år, mellom anna fleire lærlingar. Teca er ein teknisk totalleverandør i Sunnhordland og består av fleire lokale selskap med lang historie som har blitt slått saman.
