– Ho er ein god ressurs å ha med på laget

– Eg veit at mange kallar det berre for BUA, og sjølv om BUA absolutt er ein del av det, så er det ei viktig presisering frå vår sida at det heiter Frivilligsentralen Nord, understrekar dagleg leiar for Frivilligsentralen Sør Veronika Thorsen.

Ta tempen

Vidare fortel ho at det er ei som har fått tilbod om jobben, og som dei er glade for at takka ja.

– Ho heiter Bente Nilsen, men ikkje den Bente Nilsen. Dette er ei anna ei som kjem reisande frå Stadt kommune. Det er ei fantastisk flink dame som har jobba med frivilligsentralar i mange år, også inn mot Norges Frivilligsentral. Ho er ein god ressurs å ha på laget og me er veldig nøgde med å ha ho med oss, skryt Thorsen.

Thorsen er også klar på at det var ein vanskeleg søkjarrunde med mange gode kandidatar.

– Me fekk inn veldig mange gode søknadar, men det er heilt klart at ho utmerka seg tidleg med den breie erfaringa si. Me er glade for å ha ho med på laget, men me skulle også gjerne hatt jobb til alle, seier ho.

Den nye daglege leiaren Bente Nilsen startar i jobben 1. august, og Thorsen understrekar at ho skal få lov til å definera litt sjølv korleis løpet skal leggast opp.

– Det er jo klare føringar frå både kommunen og sentralt, men ein frivilligsentral jobbar ikkje med det same som ein annan. Kva som er behov for i Rosendal er det den nye leiaren som skal få ta tempen på, forklarer Thorsen.

– Frivilligsentralen Nord blir plassert i praksisfløyen, som for augeblinken er i ferd med å bli pussa opp. Det er godt rom der frivilligheitane får sin eigen møteplass, i tillegg til at Bua også blir ein del av det. Så håpar me at me kan nå nokre av behova i Rosendal og at me lagar ein plass der folk kan samlast og får eit hus å bruka, avsluttar ho.