Hjartestartar ved Halsnøy svømmehall
Nyleg fekk Halsnøy ny hjartestartar, nærare bestemt ved svømmehallen ved Øyatun skule. Det fortel rektor ved Øyatun, Hege Mehammer Tofte.
Leiaren i Halsnøy Idrettslag si svømmegruppe, Tommy Timenes, sa at svømmegruppa hadde lyst til å gje ein hjartestartar til bassenget på Halsnøy.
– Me hadde livreddingskurs tidlegare i haust med Jonny Lygre frå Hjertehjelpen, og fekk demonstrasjon av hjartestartar. Då tenkte me at me burde ha ein hjartestartar ved bassenget, og bestilte ein frå han, fortel Timenes.
Annonse
Timenes fortel at dei også bestilte spesialboks slik at hjartestartaren kan henga ute. Dette gjer det mogleg for AMK (Akuttmedisinsk kommunikasjon) å nå han. Hjartestartarar bør registrerast på 113-appen, slik at ein kan finna informasjon om hjartestartarar i nærleiken.
– Me er veldig glade for hjartestartaren, seier Mehammer Tofte.
– Det er mange som brukar bassenget; dei ulike svømmegruppene til Halsnøy Idrettslag, det er skulesvømming og offentleg bading, samt fysioterapibadinga, legg ho til.
Timenes understrekar at hjartestartaren ved bassenget kan nyttast av både barn og vaksne.
Annonse
– Sidan svømmebassenget vert brukt til svømmetrening for barn, var det viktig for oss at det var ein hjartestartar tilpassa barn. Me håpar sjølvsagt at me aldri får bruk for han, sluttar han.
Oversikt over hjartestartarar
Hjartestartaren i bassenget er ikkje så langt unna andre hjartestartarar i området.
– Det heng ein hjartestartar inne på Halsnøy brannstasjon, og så heng det ein ute på eit privathus nede ved fotballbanen, seier Mehammer Tofte.
I sommar kom det også hjartestartar opp på ein av ytterveggane til Halsnøy Kulturhus.
For å sjekka kvar næraste hjartestartar er, kan ein sjekka hjartestartarregisteret på 113-appen, eller gå inn på nettsida 113.no. Her kan ein også finna ut om hjartestartaren heng ute eller inne, opningstider til lokalet dersom han heng inne, og eventuelt kven ein må kontakta ved behov.
Annonse
Etter ei oppteljing Grenda har gjort, finn me at det per dags dato står registrert 52 hjartestartarar i Kvinnherad kommune. Dette talet er ikkje nøyaktig, då ikkje alle hjartestartarar er registrerte enno, slik som til dømes den nye hjartestartaren ved Øyatun svømmehall. Men det er hjartestartarar i dei fleste bygder frå Mauranger til Fjelbergøy, og plasseringa av desse finn ein som sagt på 113.no.
