Hjarterom og julestemning hjå Frivilligsentralen

Totalt vart dei 28 feirande, inkludert både friviljuge og gjester.

– Det var suksess det med god stemning, god mat og ei bra feiring, konkluderte ein av dei som hadde meldt seg som friviljug Karl Petter Vårdal.

Nissen og god stemning

– Lokalet vart pynta dagen før, så møtte me opp klokka eitt på julaftan for å varma opp maten og gjera alt anna i stand. Så kom gjestane klokka tre og då vart det fyrst middag med pinnakjøt og alt av tilbehøyr, etterfylgd av litt leiking, gåveutdeling til borna under 18 år, samt gang rundt juletreet. Kvelden vart avslutta med kaffi og kaker, fortalde Vårdal.

Sjølv om Frivilligsentralen stengde påmeldinga allereie 15. desember, var det nokre ekstra gjester som dukka opp på julekvelden.

– Ja, det kom ein familie som ikkje hadde meldt seg på på førehand, men me kan jo ikkje avvisa nokon så sjølvsagt fekk dei også bli med. Heldigvis har Frivilligsentralen ekstra ting og gåver liggande, så me fekk ordna med presangar til ungane som kom, sa Vårdal.

Og sjølvsagt kom også nissen ein tur innom.

– Me fekk spørsmål frå ein friviljug, Ivar Gundersen, om det var noko han kunne hjelpa til med. Då eg sa at me trong nokon til å vera julenisse så ville han gjerne bidra med det. Så alle born under 18 år fekk kvar sin presang. Lene Taranger kom også innom og spelte julesongar på piano for oss, la Vårdal til.

I fylgje Vårdal vart dei oppmoda av tidlegare dagleg leiar for Peppes pizza Magni Gjuvsland til å ta over stafettpinnen frå i fjor då ho sjølv arrangerte ei liknande feiring i det som då var Peppes pizza.

– Magni oppmoda nokon til å ta over stafettpinnen, då meldte Kristin Sund seg. Det var ho som heldt tråden i alt saman, med det var leiar for Frivilligsentralen Veronica Thorkildsen Thorsen som stod for sjølve påmeldinga og bestilling av varer. Det var Kristin som så spurde om eg ynskte å vera med, og i år så passa det ganske fint. Til saman vil eg tippa at me var kring sju friviljuge, forklarte Vårdal avslutningsvis.