Historisk låg arbeidsløyse i Sunnhordland

Dette er om lag på same nivå som november månad, skriv Nav i ei pressemelding. Andel heiltidsledige av arbeidsstyrken i Sunnhordland har ikkje vore så låg over ein så lang periode tidlegare.

I 2022 var andel heiltidsledige 1,3 prosent, i 2023 var den 1,0 prosent og i 2024 enda det på 1,1 prosent. Snittet for åra 2000 til 2021 var 2,7 prosent, med ein topp på 4,1 prosent i 2016.

Vil ha jobb

Heiltidsledige er personar registrerte som arbeidssøkarar hos Nav, som har vore utan arbeid dei siste to vekene og er tilgjengeleg for ordinært arbeid.

– Med eit no stabilt, lågt nivå for arbeidsløysa i Sunnhordland, vil vi i Nav også i tida framover vera ein viktig samarbeidspartnar for bedrifter i regionen som ønsker å rekruttera. Likevel ser vi at det framleis er mange som står utanfor arbeidslivet, men som har eit mål og ønske om å koma i arbeid, uttalar Håvard Lægreid, leiar i Nav region Sunnhordland i pressemeldinga.

– Som eit ledd i å både inkludera dei som står utanfor og driva rekrutteringsbistand for bedriftene, har vi dei siste åra mellom anna starta opp fleire kvalifiseringsløp i samarbeid med det lokale næringslivet, noko vi ser på som svært nyttig både for arbeidssøkarane og bedriftene våre, legg Lægreid til vidare.

Fleire fagarbeidarar

Nav oppdaterer jamleg arbeidsmarknadsprognosane sine for Norge. I prognosa publisert i desember i år, spår ein at arbeidsledigheita på landsbasis i 2025 vil halda fram med å auka noko, men i eit saktare tempo enn den har gjort. For 2024 enda den nasjonale arbeidsløysa på 2 prosent, og er venta å auka til om lag 2,1 prosent i 2025 og 2,2 prosent i 2026.

– I Sunnhordland er det venta at ledigheita vil halda fram med å ligga på eit lågare nivå enn resten av landet i 2025. Oljeinvesteringane er venta å halda seg på eit høgt nivå også i det neste året, noko som er positivt for industrien i regionen vår. Det vil difor også i det komande året kunna bli utfordrande å skulla få tak i kvalifisert arbeidskraft, skriv dei.

For å hjelpa til med dette vil Nav i 2025 gå i gang med eit prosjekt saman med fylkeskommunen og fleire arbeidsgivarar i regionen, i ei satsing som blir kalla Fagveg.

– Her vil aktuelle arbeidssøkarar gå gjennom ei fleksibel og tilrettelagt opplæring for å oppnå kvalifikasjon som fagarbeidar, skriv Lægreid.

Flest uføretrygda

I Sunnhordland er talet på uføretrygda 11,3 prosent av arbeidsstyrken, noko som er høgare enn snittet både nasjonalt (10,5 prosent) og i Vestland (8,9 prosent). Blant kommunane i Sunnhordland er det Kvinnherad som har det høgaste snittet med sine 12,3 prosent, noko som er 2,5 prosentpoeng høgare enn den kommunen i Sunnhordland der det er lågast, som er Bømlo med 9,8 prosent.

– Vi i Nav skal sørga for at dei personane som mottek uføretrygd, og som tek kontakt med oss med eit ønske om å koma i arbeid, skal få god rettleiing og bistand til å oppnå dette. Målet vårt er at dei som kan kombinera uføretrygda si med ei arbeidsinntekt, skal få høve til dette, sluttar Nav-leiaren.