Himmelfenomen lyste opp på minnebrikkene

Mange har fått med seg den lysande kula som passerer jorda i desse dagar. Kometen har det offisielle namnet C/2023 A3 Tsuchinshan-ATLAS, og var nærmast jorda 12. oktober, men vil vera synleg her i Kvinnherad resten av veka, vel og merka om skyene held seg vekke i vest.

Ynskjer du å freista lukka dei neste dagane, må du finna deg ein mørk plass og retta augo mot vest der sola gjekk ned, kring ein time etter solnedgang. Men etter klokka 21, er det for seint, då har han passert under horisonten.

Kometen skal vera om lag tre kilometer i diameter, stappa med is, stein og skit, og med ein hale av gass og støv etter seg.