Hilde Svalbjørg tar over taktstokken for Strupebandet

Kari Tarberg har vore dirigent for Strupebandet sidan 2010. Før jul meldte ho brått at ho ville trekkja seg frå oppgåva, og overlate taktstokken til nokon andre. Med det stod koret plutseleg utan dirigent, og det kunne ikkje Hilde Svalbjørg vera vitne til.

– Eg blei spurt om å vera dirigent, og då sa eg fyrst nei, men eg ombestemte meg like etter. No er planen å vera dirigent ut vårsemesteret, slik at dei får tid på seg til å finna nokon fast, seier Hilde.

Det å vera dirigent er ikkje eit ukjent territorium for Hilde. Ho tok nemleg over roret då Torvald Gjerde, Strupebandet sin første dirigent, gav seg.

– Eg har vore dirigent for koret i periodar før, litt liknande som no - i overgangen til ein ny fast dirigent, seier ho og held fram:

– Det er jo ei svært spanande og kjekk oppgåve, spesielt når det er saman med ein slik flott gjeng med mykje positiv energi. Då eg vart spurd om å ta over blei eg fortalt at eg kan få velja kva me skal syngje, og det er jo ekstra moro. For vårsemesteret skal eg difor lage eit program fylt med musikal-songar. Det er noko eg føler eg har eit forhold til samt noko eg har grunnlag til å instruera. Det har vore veldig kjekt til no.

Spanande framtidsplanar

Sjølv om Hilde har erfaring frå tidlegare og likar seg godt i dirigentrolla, fortel ho at det er ein travel kvardag som ventar. Ho jobbar nemleg som assisterande rektor ved Kvinnherad vidaregåande skule, samstundes syng ho i eit damekor på Stord. Her er ho også styreleiar.

– Eg har nok å halda på med, for å sei det slik. Det er difor eg har teke på meg ei mellombels rolle som dirigent. Det å ha eit slikt ansvar med førebuing av øvingar, og sette opp eit program er svært tidkrevjande, men heldigvis har eg flinke folk i styret med på laget. Me har stort sett planlagt vår-programmet, så no gler me oss til å fortsetje øvinga.

Som følgje av koronapandemien har det for koret vore utfordrande å samlast til øving.

– Det er litt fråvær for tida då nokon er sjuke, og andre er kanskje redd for å bli smitta - noko som er forståeleg. Me har difor ikkje vore fulltalig enno, og me har måtta spreidd oss rundt i salen. Men no byrjar det å ta seg opp med koristar, og me kan endeleg øve som normalt, fortel ho.

Hilde ser fram imot våren saman med Strupebandet, og lovar eit spanande program.

– Eg har mellom anna inngått eit samarbeid med Ingeborg Kvamme, som tidlegare har hjelpt koret med scenografi. Ingeborg har kontaktar i teatermiljøet, og skal difor få tak i ein regissør som skal koma å hjelpa oss med sceneintruksjonar. Det trur eg kan bli både gøy og kult, smiler Hilde.