Hilde og Leif Sverre jobbar med å finna arbeidsforma

Då Hans Inge Myrvold vart kalla til teneste for Stortinget, inngjekk Arbeidarpartiet og Høgre eit valteknisk samarbeid som sikra partia dei viktigaste politiske posisjonane. I kjølvatnet av at Hilde Enstad (Ap) vart ordførar og Leif Sverre Enes (H) vart varaordførar, vart stillingsstorleiken til sistnemnde auka frå 15 til 50 prosent.

– Eg har proklamert at eg skal vera litt ute i terrenget, men det har vore litt mykje å setja seg inn i no i starten. Eg er heilt fersk i denne rolla, og sjølv om Hilde har vikariert litt i ordførarstolen, så er ho også litt ny i rolla si. Og så skjedde overgangen ganske brått for oss, fortel Enes.

Nærpolitikkreform

Når Grenda treffer den politiske toppleiinga på ordførarkontoret, er det like før dei skal i lunsj med næringssjef Grete Solheim. Det er noko dei har annakvar veke.

– Me blir litt lyttepost for kvarandre. Me skal ikkje driva med sakshandsaming, men me skal kjenna sakene, kommenterer Enstad.

Arbeidsfordelinga mellom Enstad og Enes er ikkje spikra på noko vis, men sistnemnde har mellom anna eit stort hjarte for næringslivet. Målsetjinga er at sistnemnde skal driva frittgåande og oppsøkjande verksemd.

– Me håper å få høve til fleire bedriftsbesøk snart, meir enn me har hatt lov til så langt. Den første me har planlagt er til Kvinnherad Næringsservice i neste veke, seier Enstad, og legg til at varaordføraren har kasta seg i bilen og køyrt ut til folk som har ringt dei om prosjekt eller problem.

– Eg driv litt nærpolitikkreform, ler han med referanse til nærpolitireforma som har som mål å få fleire politi nærare publikum som treng dei.

– Eg likar å sjå kva folk held på med, auga til auga. Eg er betre i munnleg enn skriftleg. Det er ikkje alltid me klarer å hjelpa, men me prøver, forklarer han.

– Me er her for å sørva innbyggjarane. Eg har proklamert at me skal vera ein Ja-kommune, og det er i den forstand at me skal møta alle positivt. Men det betyr ikkje at me seier ja til alt, slår Enstad fast.

– Det er ikkje berre næringslivet som kan ta kontakt. Det gjeld alle, om høgt eller låg, seier dei.

Unngår stridstema

At Enes er i 50% stilling som varaordførar, gjer at ein no har eit ordførarteam som i langt større grad enn før kan utfylla kvarandre.

– Eg er innom her på rådhuset sikkert fire dagar i veka, og eg bruker meir tid på det enn dei femti prosentane stillinga tilseier, men eg er engasjert. Det var mange lause trådar då me starta, og me er i ferd med å få nøsta opp i dei, meiner Enes.

Det er saker dei er usamde om, og dei temaa oppsøkjer ikkje dei to politikarane.

– Skulesaka er der Arbeidarpartiet og Høgre har størst avstand oss i mellom, men den saka er ferdig behandla for denne perioden, seier ordføraren.

– Det er elles ikkje den store usemja i Kvinnherad for tida, vurderer Leif Sverre Enes.

Difor har ikkje partia som i rikspolitikken tydeleg står på kva si side noko problem med samarbeid lokalt.

– Ein er mykje tettare på kvarandre i lokalpolitikken enn i rikspolitikken. Ein må vera meir pragmatisk enn prinsipiell på vårt nivå, meiner Enstad før ho og varaordføraren begge tar opp kvar sin nistepakke i grått matpapir og går for å eta lunsj med næringssjefen.