Hevdar nokon får høgare skatt

At kommunestyret fastsette nye eigedomskattevedtekter høyrest kanskje kjedeleg ut. Men Leif Sverre Enes (H) meiner ein konsekvens av vedtaket er at innbyggjarane i dei minste bygdene må betala meir i skatt.

– Det vert høgare skattetrykk på dei som bur i mindre sentrale strøk og lågare skattetrykk på dei som bur i sentrale strøk. Dessutan mistar vi kontakten med innbyggjarane når det ikkje lenger skal vera ei klagenemnd, for det er overlate til «høgare makter», sa Leif Sverre Enes i kommunestyret førre torsdag.

Med høgare makter viste han til Skatteetaten, som klager på verdisetjinga av bustader heretter skal rettast til.

Når det gjeld sjølve skatten, føreslo Enes heller å bruka ei såkalla kontorjustering. Ei liknande sak var oppe i kommunestyret i september, då det vart bestemt å nytta Skatteetaten sin likningsverdi som grunnlag for eigedomsskatt på primærbustader frå 2021. Den gong vart Høgre ståande åleine mot innstillinga.

 

Angrar

– Eg skal innrømma at det eg angrar mest på i politikken, er at eg ikkje støtta Høgre sist, men det kom litt brått på, kommenterte Jostein Saghaug (MDG), som no røysta med Høgre.

Det gjorde ikkje Marit Elisebet Totland (KrF). Ho tykte Høgre berre prøvde seg på ein omkamp. Denne gongen vart røystetalet 20-13 for innstillinga, så Enes sitt forslag falt.

– Nokon kjem til å få seg ei overrasking, for no har vi omfordelt skattebyrda. Nokon får meir i skatt, nokon frå mindre. Eg synest ikkje noko om det, oppsummerte Leif Sverre Enes.

Det må leggjast til at kommunedirektør Ragnhild Bjerkvik hevda at ei kontorjustering ikkje vil vera mogleg før i 2032.