Hevdar det er feil i talgrunnlaget for Ølve barnehage

Ølve barnehage er ein av barnehagane som blir føreslått lagt ned til hausten. Foreldre stussar over talgrunnlaget i saksframstillinga.

I saksframlegget som levekårsutvalet fekk til saka om oppvekstkår, påpeikar foreldre til barn i Ølve barnehage at det ligg faktafeil både på tal barn og storleiken på barnehagen.

– Det er ein oversikt som skal belysa overkapasiteten i barnehagane. Denne tabellen er i utgangspunktet misvisande, då eit born under 3 år slik eg forstår det tel to plassar. For Ølve sin del er det feil tal born. Det går i dag fem barn her, fire av desse er under tre år, noko som vil seia at det er ni plassar i bruk av dei 18 tilgjengelege. Altså er tabellen sterkt misvisande for Ølve barnehage sin del, påpeikar John Ulvenes, som er far til to av barna i barnehagen.

Han peikar vidare på at arealet på barnehagen også er oppgitt feil i samband med tilsynsrapporten som vart utarbeidd i forkant av oppvekstkårsaka. I sakspapira blir bygget oppgitt til 403 kvadratmeter, og samla areal til 561 kvadratmeter.

– Barnehagen er meir eller mindre identisk med Hatlestrand barnehage, berre spegelvendt. Der er arealet oppgitt til 189 kvadratmeter, påpeikar Ulvenes.

– For vår del handlar dette om vår barnehage, og framtida til den. Når kartet ikkje stemmer med terrenget, så endar ein opp med å leggja vegane feil. Det er viktig at politikarane får rette tal å forhalda seg til når dei skal treffa slike vedtak, sluttar Ulvenes.