Heva sokken båt

Ein 55 fot stor trebåt gjekk til botnars i Opsangervågen på Sunde i midten av februar. Denne veka vart han heva, men båten er nok å rekna som vrak no.

«Strandlandet» låg i vinteropplag då den sokk. Fartøyet enda på kring åtte meters djupne, og berre mastene stakk over vassyta etter forliset. Om bord var det vel 200 liter diesel og vel 10 liter med smøreolje. Kvinnherad brann og redning la difor ut lenser, som låg i sjøen i tre veker.

Den 20. april sendte Kvinnherad kommune ut førehandsvarsel om at det vil bli fatta pålegg om fjerning av båten, dersom det ikkje vart rydda opp innan åtte veker. «Båten som ligg nedsøkt reknar vi som avfall etter forureiningslova § 27 fyrste ledd», stod det i varselet. No er altså båten heva.