Heva kontrakten – usemje om millionbeløp

Arbeidet med å forbetra vassforsyninga i Husnes-området, har enda i strid mellom Kvinnherad kommune og entreprenøren Norwegian Pipeline Drilling AS.

I fjor vår bestemte kommunestyret å auka kapasiteten til Husnes vassverk, slik at dei om lag 7.000 innbyggjarane på Husnes, Sunde, Valen og store delar av Halsnøy skulle få sikrare vassforsyning. Vassverket si forsyningskjelde er Hellandselva og største vasskjelde i nedbørsfeltet er Svartavatnet. Vatnet har blitt regulert mellom kote 765 og 772 ved hjelp av hevertleidning, men i tørre periodar har det vore for lite vatn til å sikra drikkevassbehovet.

Løysinga vart å etablera borehol på 25 meters djupne i Svartavatnet, slik at tilgangen på vatn vart monaleg større. Samstundes skulle kapasiteten aukast frå 60-70 liter i sekundet med heverten til 480 l/s med borehol. Prosjektet er kostnadsrekna til vel 19,2 millionar kroner eks. moms.

 

Misleghald

Arbeidet vart lyst ut som ein konkurranse med forhandling. Norwegian Pipeline Drilling AS i Stavanger kom med den lågaste prisen, og vart tildelt oppdraget. Ifølgje sektorleiar Sigbjørn Øye kunne firmaet sjølv avgjera om dei ville laga eitt eller to borehol, og dei valde to. Men den 28. januar gjekk selskapet til det skritt å heva kontrakten med kommunen.

– Dei påstår at årsaka er betalingsmisleghald frå kommunen si side, noko vi meiner det ikkje er grunnlag for å påstå. Om det blir eit rettsleg etterspel, veit eg ikkje, seier Øye til Grenda.

Sektorleiaren tykkjer i staden at det er entreprenøren som er skuld i konflikten.

– Oppdraget er ikkje utført i tråd med kontrakten. Dei har også brukt for lang tid, og dagbøter kan difor verta aktuelt. Vi meiner dei ikkje har levert som avtalt, og held difor pengar attende no i sluttfasen, opplyser Øye.

– Kan du seia kor mykje pengar det dreiar seg om?

– Det er i alle fall fleire millionar kroner.

 

Lekkasjar

Sigbjørn Øye hevdar det er fleire tilhøve Norwegian Pipeline Drilling AS har svikta på.

– Dei skuldar på dårleg fjell og uføresette ting, medan vi meiner dette er tilhøve dei sjølve måtte ha sjekka opp i på førehand. Dei har ikkje levert det dei skulle levera, dei trefte ikkje der dei skulle høgdemessigt, og dimensjonane er for små slik at vi ikkje har fått den kapasiteten vi skal ha. Det er òg lekkasjar i borehola, og vi meiner dei ikkje har injisert og stabilisert slik dei skulle, oppsummerer Øye.

Han opplyser at kommunen no vil ta hand om og fullføra prosjektet sjølv.