Herøysund Explorers vekte begeistring i Trondheim
Sjølv om det ikkje vart medalje på First Lego League-laget frå Bringedalsbygda skule, vekte dei stor begeistring hjå dommarane for sine kreative løysingar.
Laurdag konkurrerte ivrige Herøysund Explorers frå Bringedalsbygda skule i den skandinaviske finalen i First Lego League. Prestasjonen deira enda med stor applaus frå dommarane og publikum under årets finale.
– Dei fekk mykje ros både frå dommarane på robotbanen og på presentasjonen, fortel Matthias Zimmermann, lærar ved Newton-rommet.
Annonse
Denne helga var fleire hundre born og unge samla i Trondheim for å konkurrera i finalen. Etter å ha jobba i fleire månader, fekk deltakarane for siste gong visa fram kreativiteten, samspelet og pågangsmotet i sine presentasjonar, og i gjennomføringa av robotkonkurransen.
Gøy med realfag
– Det har vore både utfordrande og lærerikt. Det er eit stort og viktig tema, seier elevane i Herøysund Explorers.
Sjølv om Herøysund Explorers ikkje tok med seg medalje heim etter finalen, vekte forskarspirene fra Bringedalsbygda skule begeistring hjå dommarane. Dei har forska på, og kome med utbetringsforslag for det ubemanna forskingsfartøyet FRIGG.
Annonse
– FRIGG får store problem i bølgjer og typisk Vestlandsvêr. FRIGG blir brukt til å kartlegga sjøbotn og oppteljing av ulike fiskeartar, forklarar ein av lærarane frå Bringedalsbygda.
First Lego League er verdas største teknologi- og kunnskapskonkurranse for barn og unge. Hensikten med First Lego League er å visa kor gøy, lærerikt og nyttig realfag kan vera.
