Herøysund Explorers imponerer lokalt næringsliv, og er klare for nordisk finale

Dei vil visa fram alt dei har laga til First Lego League, og har invitert både oppvekstsjefen og lokalt næringsliv. Dette er deira generalprøve før dei reiser til Trondheim for å representera Kvinnherad i den nordiske finalen der.

– Vil du ha peparkake? er det ein av dei ivrige elevane som spør.

Det var dette laget, Herøysund Explorers, som stakk av med sigeren i den lokale finalen i Kvinnherad Arena tidlegare denne månaden. Dei imponerte med både innovasjonsdelen av arbeidet sitt, og med teknologidelen. I Trondheim i helga skal dei visa fram begge deler, samt ein stand som dei har laga.

Ein einsam brisling

Det er mange smil å sjå i publikum då dei får presentert innovasjonsprosjektet. Her har elevane fått beskjed om å finna eit problem knytt til temaet «hav», og så utvikla ei løysing på problemet. Elevane har iscenesett eit heilt skodespel for å formidla arbeidet sitt, der publikum først får møta ein brisling som kjenner seg aleine i havet.

– No har eg svømt og svømt i ei evigheit for å prøva å finna stimen min, klagar Brage Brisling, spelt av Bastian.

Rolla som forskar vert spelt av Jarand. Han kan opplysa om at det har blitt sett ut eit fjernstyrt forskingsfartøy, Frigg, som skal hjelpa forskarar med å finna ut kor mykje brisling det faktisk er i fjordane våre. Problemet er at fartøyet ikkje toler bølgjene så godt, den er ikkje stabil nok.

– Me kan ikkje vera avhengige av at vêret skal vera bra for at me skal kunna bruka den. Me er trass alt på Vestlandet, seier «forskaren».

Det er her dei innovative hjernane i Herøysund Explorers kjem inn i biletet. Elevane viser korleis dei med research og teikningar finn fram til ein patent på korleis Frigg kan fungera betre, med støttearmar og flyteelement. Dei imponerer nok publikum då dei viser fram ein 3D-printa modell av båten.

Å ha det gøy

– I Trondheim skal me ha eit akvarie med sjøvatn, som denne modellen skal få ligga og duppa i, røper læraren Madeleine Røyrvik Kaldestad.

Teknologigruppa i laget presenterer så kva val dei tok under bygginga av LEGO-robotar som skulle løysa ulike oppgåver på ein bane.

– Me ville bruka store hjul, for då kunne me koma oss rundt på banen på kortare tid, grunna omkrinsen, er noko av det Aron forklarar.

Publikum får mellom anna forklart skilnaden på statiske og dynamiske verktøy, samt korleis gruppa har jobba med programmering.

– Kodinga har vore gøy, med oppturar og nedturar, at kodinga forsvinn eller klikkar. Det gjekk betre med meir avanserte kodar. Me har òg fått betre samarbeid undervegs, fortel Lars.

– Strategien vår er å ha det gøy og gjera så godt me kan, seier Emma, før ho går gjennom alle dei andre strategiske vala som gruppa har tatt.

Støttande, roleg og fokusert

Til slutt får alle gjestene sjå Herøysund Explorer sitt konkurranse-program med roboten som løyser oppgåver på banen. Gjennom løpet er det heilt stille i rommet, det er tydeleg at elevane vil ha full konsentrasjon. Innimellom kan ein høyra støttande kommentarar mellom dei.

– Det går fint, berre ta det ein gong til, seier dei roleg og fokusert til kvarandre dersom noko uventa skjer med roboten.

Publikum kviskrar imponerte kommentarar til kvarandre over kor kjapt og målretta elevane utfører oppgåvene sine når dei skal byggja om roboten midt i løpet sitt.

– Her er det mange som kunne ha lært litt om omstilling, høyrer me nokon sei med dempa stemme.

Etter presentasjonen er det mange i publikum som blir verande for å sjå nærmare på roboten og programmeringa. Elevane er rause med å visa fram og læra opp mellom anna gjester frå Hydro i korleis dei programmerer roboten.

– Dette er heilt fantastisk å sjå. Eg blir stolt over Kvinnherad-skulen, og det lovar godt for framtida, konstaterer leiar for oppvekstsektoren Heidi Særsten Solheim.

Me ynskjer Herøysund Explorers lukka til i Trondheim på laurdag!