Her kjem det rullepark til sommaren
Uskedalen får snart ein ny attraksjon for ungar og ungdomar; ein flunkande ny rullepark for syklar, rulleskeiser og rullebrett.
«Gull av grus»-prosjektet til Uskedal Idrettslag har tidlegare resultert i både kunstgrasbane, klatrejungel og ei asfaltert løype for rulleski. No skal det skje ei forlenging av prosjektet.
– Gull er eigentleg feil ord å bruka. Det er grus, smiler prosjektleiar Per Korsvold når han fortel Grenda om planane.
Artikkelen held fram under annonsen.
Etter innspel frå ungdomane skal det etablerast ein såkalla «Pump Track» mellom fotballbanen og klatreanlegget. Ein «Pump Track» er på betre norsk ein bølgebane, som kan brukast av både rullebrett, rulleskeiser og syklar. Syklistane skal kunna nytta bølgjene til å koma seg gjennom løypa utan å trø. Det vert også doserte svingar, før utøvarane kan sykla attende på ei strekning på oppsida av klatrejungelen.
– Nokon seier skatepark, men vi synest det vert for snevert, og vil heller kalla det rullepark, seier Korsvold.
Gjort noko rett
Han er sikker på at banen vil bli teken i mot med jubel.
– Vi har vore litt rundt og sett andre stader, og det kryr med ungar der. Og dei køyrer om igjen og om igjen og om igjen, opplyser Korsvold.
Idrettslaget har jobba med prosjektet i litt over eitt år. Dei har fått pengar av Sparebank1-stiftinga Kvinnherad, men håpar òg på tippemidlar.
Kvinnherad Skateklubb held no til i Uskedalen, etter at dei ikkje hadde nokon annan plass å vera. Skate-elementa deira er allereie på plass i «Gull av grus»-området.
– Vi ynskjer å få i gang eit bra skatemiljø her, fortel prosjektleiaren.
Men området er uansett allereie mykje brukt. Spesielt av yngre med sparkesykkel og vanleg sykkel.
Artikkelen held fram under annonsen.
– Vi ser jo at ungdomane heng her om kveldane, så det betyr vel at vi må ha gjort noko rett, konstaterer Per Korsvold.
Parkour
Idrettslaget er no i dialog med ein lokal entreprenør. Etter at 400 tonn grus og asfalt på toppen er på plass, kan rulleparken takast i bruk. Meininga er at opninga vert før sommaren.
– Eg trur det blir eit megakult opplegg. Når du ser aktiviteten her, så får du lyst å berre gønna på, humrar ein engasjert Per Korsvold.
Sjølv om det ikkje er prioritert førebels, røper han allereie at idrettslaget også ser for seg å etablera ein basketballbane og ein parkour-bane (anlegg for klatring, springing, hopping og balansering) i området. Basketbanen skal dessutan kunna isleggjast om vinteren.
– Men vi får ta éin ting om gongen, understrekar Korsvold.