Her kjem det ny asfalt i år: 19 km i Kvinnherad

Asfalteringslista for Vestland fylke i 2024 er klar. Dekkeleggingskontraktane vart lyste ut 12. februar, og er delte inn i tre område: Vestland nord, Bergen og kommunane rundt Bergen, og Voss, Hardanger og Sunnhordland. I alt er det 5.600 kilometer med fylkesveg i Vestland.

I løpet av 2024 skal fylkeskommunen til saman leggja ut 99.774 tonn med asfalt på 139.028 meter med fylkesveg. Budsjettet er på 121,4 millionar kroner, inkl. 25 millionar til dekke. Nytt for 2024 er at 5,2 millionar kroner er øyremerka dekke på gang- og sykkelvegar.

– For å auka levetida på dekke ynskjer vi no å forsterka og utbetra vegfundament og drenering før dekkelegging der det er behov for det, seier Helle Arve Helle, leiar hovudutval for samferdsel og mobilitet, til fylket si nettside.

Sundevegen

Fylket opplyser at det i 2023 vart gjort levetidsanalyse på dekke og bereevnemålingar på om lag 900 kilometer fylkesveg. På 18 prosent av desse vegane er det registrert kort levetid på dekke, og tilnærma alle dei same strekningane har dårleg bereevne. I 2024 og 2025 er planen å gjennomføra levetidsanalyse på resten av fylkesvegnettet.

I Kvinnherad skal følgjande strekningar asfalterast i 2024:

* Herøysund - Raudstein, 3.140 meter. ÅDT er 3217 køyretøy.

* Årsnes - Folgefonntunnelen, 12.754 meter. ÅDT er 1100 køyretøy.

* Husnes - Sunde (Sundevegen), 3.439 meter. ÅDT er 2400 køyretøy.