Her kjem BUA

Det er no bestemt at BUA/Frivilligsentralen si avdeling i Rosendal skal etablerast i den gamle praksisfløya ved Rosendal ungdomsskule.

I kommunestyremøtet torsdag spurde representanten Svein Åge Vangdal (Sp) om status for BUA/Frivilligsentralen si etablering i Rosendal. Det var i budsjettvedtaket i desember at kommunestyret sette av inntil 250.000 kroner til å finansiera leige av lokale for dette tilbodet i Rosendal. Det vart samstundes varsla same summen årleg i fire år. Per i dag finst utlånskonseptet BUA på Husnes, det same gjer Frivilligsentralen sitt kontor.

Før administrasjonen rakk å koma tilbake med eit svar til Vangdal, hadde han sjølv funne ut av saka.

– Det blir i praksisfløya, og arbeidet er rett rundt hjørna, smilte han.

Til Grenda fortel sektorleiar Sigbjørn Øye at kommunen reknar med å bruka om lag 1 million kroner til oppussing av lokala. Pengane vert henta frå vedlikehaldsfondet «Oppgradering kommunale bygg».

Truga av riving

Praksisfløya har fleire gonger vore truga av riving. I 2013 bestemte kommunen å riva, trass protestar frå FAU og andre, og det var til og med inngått kontrakt med firma som skulle gjera jobben. Men då kom Norsafe på banen, og etter litt att og fram fekk dei kjøpa for 900.000 kroner. Formannskapet vedtok imidlertid ein klausul om at Norsafe måtte syta for riving viss dei ikkje lenger hadde bruk for bygninga.

Hausten 2018 tilbaud Viking Norsafe Life-Saving Equipment AS, som då var eigar, kommunen å kjøpa praksisfløya attende, og rådmannen innstilte på å betala 3,5 millionar kroner. Formannskapet var usikre på behovet, og sendte saka i retur for vidare utgreiing. Det skjedde ikkje noko meir då, og Viking Norsafe uttalte at bygninga ikkje lenger var til sals.

Men i 2020 kom selskapet attende med eit nytt tilbod, og etter forhandlingar enda det med at kommunen betalte 1,5 millionar kroner.