– Her kan eg bu trygt, lettvint og i eit sosialt fellesskap

Då Grenda tok turen innom visninga fredag, stod Roald Urnes, dagleg leiar i Engelsen Bygg, og kona Hilde klar til å ta imot interesserte seniorar. Mange ynskja å sjå kor langt dei er komen i byggjeprosessen, og nokre kom også for å kjenna på om dette var noko for dei.

- Dette er ein veldig spanande dag. Til no har det vore fleire innom, så det har vore full rulle sidan visninga byrja, smiler Roald Urnes.

Urnes kunne fortelja at det så langt er skrive kontrakt på 22 av 29 leilegheiter i senteret. Visningsdagane var difor eit av tiltaka for å prøve å få selt dei resterande.

– Me har forstått at mange er nysgjerrige på korleis det ser ut, og det fekk me konstater då det er heile atten stykk som har meldt seg på visning fredag, og like mange på laurdag. Når me lanserte prosjektet fekk me ein overveldande respons, og den har vore god heile vegen, så at det meldte seg på så mange er kjekt, men ikkje overraskande. Husnes hadde verkeleg behov for eit slikt senteret, fortel Urnes.

Auka livskvalitet

Arbeidet med Seniorsenteret skrid fram som planlagt, og til sommaren kan ein allereie vera installert i sin nye heim sentralt i Husnes sentrum. Ansgar Bjelland (86) frå Sunde var ein av dei som var innom visninga fredag. Han har allereie signert kjøpekontrakt på ein leilegheit i tredje etasje, men han nytta seg av visningsdagen for å ta nokre mål i sin framtidige heim.

– Eg gler meg stort til å flytta inn, sjølv om det er litt vemodig. Eg selte huset mitt i november då eg signerte kjøpekontrakten, og leiger no ein leilegheit i mellomtida. Det var på tide å sjå framover, mot tider der eg ikkje lenger er så sprek. Mitt tidlegare hus var på 160 kvadratmeter og tomta var på eit par mål. Eg hadde stor plen, garasje og naust, så fritida mi gjekk mykje i å vedlikehalda dette. Eg er ikkje like sprek som eg var, men eg klarar meg. Men på eit tidspunkt kan det jo mellom anna bli vanskelig å gå i trapper. Og kva med vedlikehald av hus og hage?, seier Bjelland.

Det var bakgrunnen for at Bjelland bestemde seg for å selja huset, og flytta inn i seniorsenteret.

– Eg er forholdsvis sprek enno, men me aukande alder kan mykje endra seg brått. Med litt planlegging kan ein kunna auka livskvalitet, og det er nettopp difor eg flyttar inn i seniorsenteret. Leilegheita er bygd etter moderne standardar, og er ein livsløpsbustad. Her kan eg bu lengje, for eg treng ikkje flytta inn i noko omsorgsbustad, denne fungerer heilt flott, fortel Bjelland.

Senioren frå Sunde har kjøpt ei bustadeining med to soverom, balkong og fritt utsyn mot sentrum. No gler han seg til å nytta fritida på anna enn vedlikehald.

– I denne alderen kan ein ikkje rekna med å få behalda sertifikatet i det uendelege, så det er lurt å førebu seg i god tid. På Sunde er det mellom anna ikkje matevarebutikk. Her ved seniorsenteret er det berre ein spasertur bort til butikk, apotek, lege og andre tilbod. Her kan eg bu trygt, lettvint og i eit sosialt fellesskap, smiler ein nøgd kjøpar som gler seg stort til å vera sosial med både kjente og ukjente i senteret.

Jubileumsår og innflytting

Ekteparet Åse (84) og Ragnar Aalvik (85) var også innom visningsdagen for å sjå til leilegheita si. Dei er både nøgde og imponert over kor flott det blir i Seniorsenteret.

– Me har signert ein kjøpekontrakt på ein leilegheit i femte etasje på 70 kvadratmeter. Der har me utsikt både mot sentrum og Opsangervatnet. Men sjølv om me flytter inn i senteret har me valt å behalda huset vårt, slik at barnebarna våre kan nytta det til feriehus, fortel Åse.

Ekteparet var heldige med leilegheita i femte etasje. Denne var eigentleg reservert til nokon andre.

– Det var svært tilfeldig at me fekk akkurat denne. Då me byrja å kikka etter leilegheit i senteret var det nokon som sa denne ifrå seg, og då slo me til med eingong. Det angra me ikkje på, seier Ragnar medan kona legg til:

– Me blir gamle, og då er det naudsynt å tenkja framover. Leilegheita er flott den, med gode løysingar - sjølv om det er litt smått i forhold til kva me er vane med.

Ekteparet, som har 60 års jubileum til sommaren, gler seg stort til innflytting i juni.

– Då blir jubileumsåret feira med innflytting og ny leilegheit, det blir stas, smiler dei.

Visning i Seniorsenteret på Husnes held fram i dag, laurdag.