– Her er ei oppgåve for dei som er interesserte

Bente Haugen frå Rosendal Helselag ynskte velkomen til dei kring femti lærelystne som hadde samla seg i Nyasago i Gurinefjæra for å høyra kva Feet hadde å seia om temaet, noko som resulterte i eit nesten fullsett lokale.

– Fyrste gong eg heldt dette føredraget var på biblioteket til null kroner for inngang, andre gong var i Omvikdalen til femti kroner for inngang, og no her til hundre kroner for inngang. Ikkje veit eg kor dette skal ende, skjemta Feet til fengande latter frå salen.

Ledig prosjekt

Johan Feet, som Grenda også har skrive om før, jobba i kommunen med kart og oppmåling i heile 46 år. Det var derimot fyrst som pensjonist at han starta med å digitalisera stadnamna som blei samla inn på 70-talet av Guddalsbrørne Ragnvald og Oskar Guddal, samt også Torkjel Naterstad.

Desse namna vart så berre liggande og samla støv i eit bortgøymd arkiv hjå kommunen i nærare 40 år, heilt fram til Johan Feet pensjonerte seg og bestemte seg for at desse måtte få koma fram i det digitale lyset.

– Brørne Guddal og Torkjel Naterstad klarte å samla inn kring 30.000 stadnamn frå heile Kvinnherad, og sist eg sjekka så har eg digitalisert 24514 av dei. Men etter at eg sjekka så jobba eg vel om lag ein time til, så då er det nok 100 meir enn det igjen, fortalde Feet.

– Eg manglar framleis frå Ænes og utover mot Årsnes, og av ein eller anna grunn så hoppa eg over Gjetingsdalen. Men der skal eg også få lagt inn, la han til.

Feet fortalde også at då desse namna vart samla inn, så vart det samla inn namn berre under 500 moh.

– Alle namn over 500 moh er ikkje teke med, så her er det ei oppgåve for dei som er interesserte, freista Feet dei frammøtte med.

Utforsking

Ein god del av føredraget vart brukt til å syna fram nettstaden der ein kan finna alle desse stadnamna, nemleg lokalnamn.no.

– Her er kan ein sjå stadnamn frå fleire stader i Norge, men ein kan velje spesifikt Kvinnherad og sjå alle namna som er lagt inn her i frå. Ein kan også senda inn namn eller retting av namn dersom ein veit om noko som ikkje er komen med, forklarte Feet.

Etter føredraget sa fleire seg einige i at det skulle bli kjekt å utforska nettstaden litt meir for å bli betre kjend med eigen kommune.

– Det var interessant å høyra på, og stod heilt til forventingane. Eg er ikkje så flink til å leggja inn namn sjølv, men eg kjem absolutt til å bruka nettstaden når eg er på tur, sa Kjersti Brakstad Øvsthus.

Ein annan let seg imponere over alt arbeidet som var blitt gjort.

– Det er eit vanvitig arbeid, og det var både kjekt og interessant å høyra på, slo Jostein Hatteberg fast.

Mannen sjølv konkluderte noko beskjedent med at det verka som folk var interesserte.

– Eg kunne sikkert ha vore flinkare på å uttrykka meg, det er ikkje heilt mitt fag, men det er kjekt at det kom ein del folk, sa Feet etterpå.

At stadnamn er noko som fenger er det liten tvil om. Nyasago regelrett summa etter at Feet hadde sagt sitt, og fleire tok kontakt med føredragshaldaren etterpå for både å diskutera og stilla spørsmål.

Arrangøren, Rosendal Helselag, stilte også med både kaffi og kaffimat som ein del av inngangsbilletten. Til stor glede for dei fleste.

Frå Øltapparen til Skotaneset