– Her er det farleg
Ein innringar meiner fleire stader langs den nye gang- og sykkelvegen i Herøysundet er farlege. Utbyggjaren er ikkje samd.
Publisert
Grenda har blitt kontakta av ein innbyggjar som på eine sida slår fast at gang- og sykkelvegen gjennom deler av Herøysundet har blitt flott, men som samstundes fryktar at nokre punkt kan vera direkte farlege. Ho tykkjer at korkje Berge bru eller Tveit bru er godt nok sikra, og er redd unge syklistar kan falla uti. Det same gjeld det som vert karakterisert som eit krater i det nordlege krysset til Bringedalsvegen.
Prosjektleiar Bjørnar Eidnes i Vestland fylkeskommune deler ikkje denne oppfatninga.
Annonse
– Alt er bygd etter handboka, og det er trygt etter vår vurdering. Mellom anna er kantbjelkane trekt ut forbi bruene. Ein kan jo alltids sikra endå meir, men det er òg eit kostnadsspørsmål, seier han til Grenda.
Det har også blitt påpeika at Bringedal bru er for dårleg sikra, og her kan Eidnes opplysa at dei vil setja opp eit gjerde.
– Men de vil ikkje gjera noko dei andre stadene?
– Nei, ikkje førebels, fortel prosjektleiaren.
