Her er den nye journalisten i Grenda

Eli Hårklau frå Halsnøy er tilsett som ny journalist i Grenda.

Etter å vore underbemanna ein lengre periode, har Grenda endeleg fått ny journalist på plass. Det er Eli Hårklau som har fått jobben.

– Eg kjem opphavleg frå Voss, har ei jente på fem år, og har budd i Kvinnherad stort sett sidan 2007. Unnataket er to år då eg skulle flytta vekk frå Kvinnherad, men ombestemte meg raskt, smiler ho.

Bakgrunnen hennar er innan musikk og teater. Ho er mellom anna utdanna musikkvitar med jazzvokal som hovudinstrument. Årsaka til at ho flytta til Kvinnherad i si tid, var at ho fekk jobb som teaterlærar på Sunnhordland Folkehøgskule på Halsnøy.

– Det var draumejobben, slår ho fast.

Skreiv teater

Ho har også opptredd sjølv som songar, ikkje minst i lag med Halsnøy Storband i den tida bandet var aktivt. Tidlegare har ho også sysla med å skriva eigne teaterstykke.

– Det var helst då eg var «ung og sprek» eg brukte feriane på å skriva teater. Det har ikkje blitt tid til så mykje i seinare år, seier 44-åringen.

At ho no blir journalist, heng delvis saman med at folkehøgskulen på Halsnøy ikkje fekk nok søkjarar til at det blir teaterlinje komande skuleår.

– Men eg har eigentleg gått og tenkt på ein journalistjobb i fleire år. Eg har sagt til folk rundt meg at eg skulle likt å prøvd meg i ei lokalavis. Så dukka det opp ein stillingsannonse i Grenda omtrent samstundes som det var klart at det ikkje blir noko teaterlinje til hausten. Det var rett og slett «meant to be», humrar Eli.

Storoppsetning

Det er ikkje slik at ho kuttar alle banda til folkehøgskulen. Ho skal framleis ha 20% stilling der, samt 80% i avisa.

– Det blir mest tilsyn, kveldsvakter og laurdagsundervisning. Og i februar må eg ta fri frå Grenda for å vera regissør på den årlege storoppsetninga til folkehøgskulen, fortel Hårklau.

Når ho ikkje er på jobb, likar ho å halda seg oppdatert på politikk og elles kva som skjer rundt om i verda. Utanom det står naturen høgt på lista.

– Fjella i Kvinnherad lokkar alltid. Viss eg ikkje må på jobb og det er fint vêr – då går eg til fjells, seier ho.

Det er forresten ikkje lenge til Grenda blir underbemanna igjen. Avisa lyser no etter ny redaktør, og grunna ein ventande permisjon er det også behov for ein vikar. Så det er berre å søkja.