Her er den nye hotellsjefen

Den 1. januar i år fekk Rosendal Fjordhotel ny eigar. Då selde hotelldirektør Arne Havnerås og resepsjonssjef Inger Johanne Ljosnes sine aksjar til Bergensselskapet West Coast Invest. Samstundes varsla Havnerås at det etter kvart skulle tilsetjast ny direktør, sidan han sjølv nærma seg pensjonsalder.

Har selt Rosendal Fjordhotel

No er den nye sjefen allereie på plass. For den 1. mars byrja Christian Lyngholm i stillinga. Han er 31 år gamal, født og oppvaksen på Rjukan. Det siste året har han vore direktør på Risør Hotel.

– Der hjelpte eg eigaren med å starta opp igjen hotellet etter pandemien. Elles har eg vore i hotell- og restaurantbransjen så lenge eg kan hugsa, og har jobba både i Norge og i Italia, fortel Lyngholm.

Stor interesse for hotelldirektørjobb: – Mange lokale søkjarar

Verdas beste mentorar

No skal han styra eit hotell med 94 rom og 190 senger, samt 17 fast tilsette; eit tal som aukar til om lag 35 i høgsesongen.

– Det er jo dette hotellet her, seier han og legg trykk på «dette» når han forklarer kvifor han søkte på stillinga.

– Korleis har fyrsteinntrykket vore?

– Veldig bra! Eg er blitt utruleg godt teke i mot av Inger Johanne og Arne. Dei er verdas beste mentorar. Dei har bygd opp eit flott og veldrive hotell, og tradisjonane som dei har etablert skal eg ta vare på, seier Lyngholm.

Havnerås og Ljosnes skal snart avslutta sine karrierar på fjordhotellet.

– Vi skal tre til side og overlata skuta til Christian. Men vi skal vera vegleiarar for han ei tid framover, medan han gjer seg kjent med hotellet, dei tilsette, bygda, kommunen og kundane. Sjølv om vi kunne ha halde fram, så ville det blitt heilt feil om vi skulle gått her som ein «7. far i huset», analyserer Havnerås.

Den nye hotelldirektøren ser ikkje noko behov for å gjera store endringar.

– Mi rolle er å driva hotellet. Med tida kjem eg sikkert til å ha nokre idear, men det er ikkje fokuset no. No skal eg setja meg inn i drifta og førebu sesongen som kjem, opplyser Christian Lyngholm.

Byggjer nytt hus

Då er det sjølvsagt stas at den komande sommaren ser lovande ut.

– Vi har fått mange bestillingar, og både kurs og konferansar er på veg tilbake, seier Inger Johanne Ljosnes.

Dei nye eigarane har elles «store planar», som Arne Havnerås formulerer det. Blant anna skal dei oppgradera anlegget. Denne prosessen starta faktisk i slutten av førre veke.

– Det fyrste er at huset til Åse (Røvde) no blir rive, og så skal det byggjast eit nytt med plass til leilegheiter på same tomta. Det blir veldig bra, seier den komande pensjonisten.

Arvtakaren får siste ordet.

– Det er menneska her som utgjer hotellet. Utan gode tilsette, så hadde det berre vore eit bygg, slår Christian Lyngholm fast.