«Hent meg»-tilbodet er i gang – fest på bussen

– Nei, no vart eg øvegidde!, utbryt Einar Oppedal idet ordføraren rekkjer ut blomabuketten.

Einar er den aller første i Kvinnherad som blir henta av «Hent meg»-bussen. Han er svært glad for tilbodet, som gjev han høve til å koma seg heilt frå døra heime til kaféen på Frivilligsentralen, til kostnaden av ein bussbillett. Ordninga er eit samarbeid mellom Kvinnherad kommune, Skyss og Bergen Taxi, og har vore diskutert alt eit par år i kommunen. No er tilbodet endeleg oppe og går.

– Eg vil berømma spesielt Ungdomsrådet for eit flott engasjement i denne saka, seier Vegard Bjørnevik.

Vil ha tilbakemeldingar

Kommunen løyver 2 millionar årleg i tre år medan tilbodet vert prøvd ut. Ein kan bestilla henting via ein app, eller ved å ringa. Tilbodet er ope mellom kl 09:00 og 14:00, og mellom kl 16:00 og 22:00. Då kan ein hentast og køyrast innanfor Husnes, Sunde og Valen. Skyss har samla erfaringar med liknande tilbod både i Odda og på Tertnes tidlegare, og vil svært gjerne ha innspel frå passasjerar i Kvinnherad på korleis opplegget fungerer.

– Me forsøker å fylla opp bussen med fleire passasjerar, så det ikkje vert unødvendig køyring att og fram. Samstundes vil me ikkje at ventetida ikkje skal vera for lang, så me prøver å finna ein balanse der, seier Roy Blommedal frå Skyss.

– Det blir ein innkøyringsperiode no i starten, så det er viktig at folk brukar tilbodet, og melder ifrå til oss om det er noko som kan betrast, seier Vegard Bjørnevik.

– Ja, eg synest at bussen må kunna gå til Sandvoll óg!, skyt Einar Oppedal inn.

Tilbod for alle

– Kva om eg skal rekka ein båt frå Sunde, spør Thea Vaage.

– Då kan du bestilla ei ankomsttid, gjerne litt før båten skal gå, for forseinkingar kan jo oppstå, forklarar Roy Blommedal. Han understrekar at alle er velkomne til å bruka bussen.

– Ungar som skal på trening, for eksempel, seier han.

Thea Vaage nemner at også barnehagar eller små skulegrupper kan bestilla bussen om dei skal ut på tur. Ho fortel også at elevane hennar på KVV har tenkt å bestilla bussen til storefriminuttet, når dei skal på kafé.

Ein kjempeflott tur!

– No er eg spent på kven me skal henta, seier Einar Oppedal.

Bussen køyrer frå Rustene mot Rørvik, der Torunn Thorsen blir plukka opp, før me køyrer vidare mot Porsvik for å henta Elrid Birkenes. Det viser seg fort at denne måten å reisa på, er svært sosial. Passasjerane hjelper kvarandre med setebeltet, og latteren sit laust.

– Eg trudde det skulle vera ein skranglebuss som kom, men denne bussen er jo kjempeflott, utbryt Torunn Thorsen.

– Eg trudde ikkje nokon visste kor eg budde, eg, men jammen fann han fram, seier Elrid Birkenes.

– Og no kjem eg til kaféen akkurat når kaffien er ferdigkokt, slår Einar Oppedal fast.