Hemmeleg prosjekt ved Malmanger skule

Men aller fyrst må me litt tilbake i tid. Tilbake til tysdag i vinterferien, då kontora til Grenda plutseleg vart innteke av fire danseglade og maskekledde karakterar. Dansande kom dei inn, med musikken på full guffe. Med seg hadde dei også sin eigen DJ og talsperson, Heidi Orholm, lærar ved Malmanger skule.

Karakterane hadde nemleg ikkje lov til å snakka sjølve, for ikkje å røpa identiteten sin. Desse, fekk me veta, hadde den siste tida dansa og vandra rundt i gongane og i friminutta på skulen, utan at elevane hadde fått veta verken kva eller kvifor. Alt var strengt hemmeleg, og Grenda vart med dette spesialinvitert på Maskorama-show veka etterpå.

Overraskinga

Tilbake i auditoriet torsdag føremiddag, anar ikkje elevane noko som helst om kvifor dei har blitt samla der den dagen. Stemninga er god og spenninga høg då lysa vert sløkte.

Etter at Hesjedal har introdusert programmet bryt både jubel og applaus laus, katta er endeleg ute av sekken. I all løyndom har lærarane og rektor ved skulen jobba i timevis etter arbeidstid med å sy, laga, filma og redigert for å stella alt saman i stand.

– Det har vore ein kjempedugnad, me har brukt mange timar på å sy kostyma. Nokre av kostyma er til dømes sydd heilt frå botnen av, andre har me funne på kostymelageret og «pimpa» opp sjølve, fortel talsperson Orholm då Grenda pratar med ho like før showet startar.

– Me har mange kreative folk her, og me har hatt det kjempekjekt medan me har halde på. Etter at kostymane var ferdige, har me filma nede på ungdomsbasen. Rektor, Bjørn Olav Tveit, har filma og redigert, fortel ho vidare.

– Korleis kom de på dette her?

– Eg fekk ein snap av nokre gamle kollegaer på ein skule nede på Sola, som hadde gjort det same der. Det tykte eg såg kjempeartig ut, så eg foreslo det her for alle saman. Det er jo eit stort prosjekt, så me trengte at alle ville vera med og hjelpa. Heldigvis tende alle på idéen, smiler Orholm.

– Etter korona har slike ting stogga heilt opp, så det var kjekt å få i gong noko att no, fortel ho vidare.

Litt skummelt

Før vinterferien kunne elevane med jamne mellomrom få sjå nokre av karakterane vandra rundt i gongane, i tillegg har det blitt hengt opp plakatar av ulike slag. Siste plakat som vart hengd opp fortalde elevane at dei ville sjåast etter vinterferien. Det er likevel ikkje alle karakterane som har fått gå rundt.

– Mor Ulv, eller Ulven, har ei maske med store tenner, og ser ganske skummel ut. Sjølv om dei berre har fått sjå han på plakatar, i tillegg til at me prøvde å ufarleggjera ho litt med å pynta ho med leppestift og falske augevipper, så har nokre av dei yngste blitt ganske skremte, seier Orholm.

I fylgje Orholm har det vore masse spekulasjonar blant elevane om kvifor desse karakterane har gått rundt.

– Nokre av kostyma har hatt litt snop og diverse dill dall hengande på, så det er mange som har håpa på at dei skal koma med snop, fortel ho smilande.

Dei neste vekene fram mot påske blir det éin eller to «avmaskingar» i veka, slik at dei blir ferdige innan påskeferien, får me opplyst.

Stort engasjement

Då Grenda tok turen inn i fjerdeklasse etter at showet var ferdig, var det full aktivitet og høgt under taket, og spekulasjonane var allereie i gong.

– Kaninen var best! ropar éin.

– Nei, det var han ikkje! ropar ein annan.

Det verka som dei fleste allereie hadde funne ein favoritt, og prøvde hardnakka å overbevisa dei hine om at «sin» var best. På spørsmål om kva dei tykte om både overraskinga og showet derimot, var det stor semje.

– Dritgøy! ropar fleire.

Det er ingen tvil om at dette har skapa stort engasjement blant både elevar og tilsette. Då Grenda går er elevane i ferd med å stemma på den dei likte best. I kjend stil, dersom ein kjenner til Maskorama frå TV riktignok, er det den med færrast stemmer som må ta av maska. Men kven det er, må elevane vente ei heil veke på å finna ut.