Helsesista: – Våg å vera!
Tale Maria Krohn Engvik, betre kjend som Helsesista, vitja Kvinnherad onsdag kveld. Det var eit lydhøyrt publikum beståande av ungdom og vaksne som fekk høyra det flotte føredraget hennar.
Publisert
Sist oppdatert
Inger Warberg frå Mental Helse Kvinnherad helsa publikum velkommen til føredraget, som markerte starten på satsinga rundt Verdsdagen for psykisk helse.
– Mental Helse, Kvinnherad kommune, Helse Fonna og biblioteket har i mange år arrangert slike informasjonskveldar om psykisk helse på biblioteket. Men denne gongen har me slått på stortromma, og då måtte me ha det i kinosalen. Me er nemleg så heldige å få tak i ei som me er veldig stolte av å kunne vise til alle dykk, sa Warberg før ho introduserte dagens gjest.
Annonse
– Formålet med dette er å auke kunnskap og senke barrierar for det å snakka om psykisk helse. Helsesista er kjempeflink å snakke med ungdom om det ungdom bryr seg om, og det er heilt fantastisk, haldt ho fram før Helsesista vart klappa vel i mot.
Sjeldan til stades
Tale byrja med å fortelja litt om slagordet hennar «Våg å vera», som også var tittelen på føredraget. Ho fortalte òg om korleis ho, litt tilfeldig, hamna på Snapchat, kor ho raskt vart heile Norges helsesista.
– For seks år sidan jobba eg som helsesøster på fire skular i Oslo. Ein dag då eg kom på jobb hang det ein lapp på døra: «Helsesøster er her kvar gong det er fullmåne og rektor haltar», stod det på den, sa ho og spurte ungdommane i salen om det er slik på deira skula òg - at helsesøster sjeldan er til stades, noko ho fekk bekrefta.
Annonse
Viktig å snakke saman
Lappen fekk ho til å føle at ho var for lite til stades, og ideen om å starte ein Snapchat-konto kor ho kunne vera meir tilgjengeleg for elevane sine, og gi dei informasjon om kva tid ho kunne møtast på kontoret, vart skapt.
Kort tid etter var kontoen følgd av ungdommar frå heile landet, og ho bestemte seg for å slutta i det som var draumejobben, for å vera Helsesista på Snapchat på heiltid.
Gjennom føredraget tok ho opp tema som tankar om sjølvmord, vennskap, pubertet, seksualitet, kropp, kjensler, grensesetting, med meir. Publikum lo og kjende seg tydeleg att i fleire situasjonar som vart presentert, samstundes som det fleire som tørka nokre tårer i augekroken fordi dei hadde blitt rørt.
I tillegg til å oppmoda alle som var i salen til å våga å vera, oppmoda Krohn Engvik òg om at dei fleste har godt av å øve seg på å snakke i lag om gode, vonde og «uønskte» kjensler.
– Vi må øve oss på å snakke om ting som er vondt og vanskeleg. For når vi øver oss blir det litt lettare, og då er ein ikkje åleine om det vanskelege lenger, sa ho, og stilte samstundes spørsmål til kvifor nokre kjensler blir sett på som dumme.
Annonse
Kvifor er det mindre greitt å vera lei seg og gråte, enn å le? undra ho, og kom med døme som synleggjorde korleis nokre kjensler blir helsa velkommen medan andre - like normale og viktige kjensler - blir behandla som uønskte.
Ein nydeleg kveld
Etter føredraget vart publikum invitert ned på Ungdomsbasen Sør for gratis pizza og vidare drøs med Helsesista og kvarandre.
«Det vart ein nydeleg kveld med haugevis av pizza, glade ungdommar og masse fine samtalar om alt frå pubertet, vennskap, sex, grensesetting og alt mellom himmel og jord!» skreiv Ungdomsbasen på Facebook då kvelden var omme.
