Helsefarlege brannstasjonar

Ingen av brannstasjonane i kommunen oppfyller krava til Arbeidstilsynet. Brannsjef Atle Josdal seier han er glad Arbeidstilsynet kom med tilsyn og avdekka svakheitene ved stasjonane.

– Eg ynskjer at brannmannskapet vårt skal ha så god sikkerheit som mogleg. Dette går på brannmannskapet si helse. Eit døme er at etter berre fem år i brannvesenet, så har du dobbelt så stor risiko for kreft som befolkninga elles. Vi treng difor å få på plass dei fasilitetane som skal vera der, for å redusere risiko for skade og sjukdom, seier Josdal.

Det vart avdekka fleire feil på dei ulike stasjonane, og i alt fekk dei seks pålegg som gjekk på risikovurdering og kartlegging, ventilasjon i brannstasjonane med vekt på ventilasjonsanlegg i opphaldsrom og eksosavtrekk i vognhallen, tilbod om vaksiner til brannmannskapet, manglande sikkerheitselar i to av køyretøya, samt at det vart kommentert at ei vaskemaskin var plassert føre einaste rømingsveg i den nye brannstasjonen i Rosendal.

– Vi har fram til 30. april med å utbetra fem av pålegga, medan vi har til 30. juni for det siste, så no jobbar vi med dei aktuelle etatane for å få dette gjort, fortel brannsjefen.

 

Problem i Rosendal

Den nye brannstasjonen i Rosendal, som berre er halvanna år gammal, har fått fleire pålegg.

– Ein skandale, meinte kommunestyrerepresentant Are Traavik (Sp), slik Grenda skreiv på tysdag.

Josdal fortel at han ikkje har oversikt over kva som kan ha hendt her.

– Det er ukjent for meg kva som kan ha gått gale her sidan eg fyrst vart tilsett 1. desember i fjor. Eg må halda meg til rapporten som no føreligg og jobbar med den. No er det mitt ansvar, og det er eg som skal følgje det opp som brannsjef, poengtere Josdal.

Pålegga i Rosendal går mellom anna på manglande ventilasjonsanlegg i opphaldsrom og mangel på rein og skitten sone.

– Arbeidstøy skal ikkje henge i vognhallen der det kan verta eksponert for eksospartiklar og andre ting. Planen er å få eit eige rom som er fysisk lukka med dør, for slik å redusera farane ved dette, opplyser Josdal.

 

Manglande sikkerheitselar

Andre ting som dei har fått pålegg er mellom anna for manglande sikkerheitselar i to av dei store utrykkingskøyretøya, stasjoner på Ølve og Halsnøy.

– Det er statistisk sett flest skadar ved utrykking frå stasjon til skadestad, så dette bør koma på plass snarast, føyer Josdal til.

Kvinnherad Brannvesen er det største deltids brannvesenet i Hordaland, med totalt 79 tilsette. 75 av disse er deltidstilsette brannmenn og kvinner.

– Brannmannskapet vårt gjer ein formidabel jobb, det såg vi no ved brannen i Uskedalen, og dei treng så sikre arbeidsvilkår som mogleg, så dette jobbar vi hardt med å få på plass.

Når utbetringane er ferdige vil dei måtte legga fram god dokumentasjon for Arbeidstilsynet. Konsekvensane for å ikkje klara dette er dagbøter.

– Det er mange stasjonar som er dårlige per i dag. Det vi jobbar med no kan vera med på å betra arbeidstilhøva for deltidsbrannmennene- og kvinnene våre som gjer ein kjempejobb, sluttar brannsjefen.